ڕاوێژکارێکی سوودانی پێشمەرجی هەڵوەشاندنەوەی گرووپە چەکدارەکان ئاشکرا دەکات

ئاڤا نیوز
 
ڕاوێژکارێکی سەرۆکوەزیرانی عێراق دەڵێت، گفتوگۆ هەیە لەسەر چۆنیەتی چەکدانانی گرووپە چەکدارەکان بەڵام ئێستا و پێشتریش ئەو بابەتە مەرجداربووە بە دۆسیەی کشانەوەی هێزەکانی ئەمریکا لە عێراق.
 
وێنە گەورەکە: ماوەیەکە هەواڵی ئەوە بڵاودەکرێتەوە کە لە ئاستی نێودەوڵەتی داواکاریی ئاراستەی حکومەتی عێراق کراوە تا گرووپە چەکدارەکان و تەنانەت حەشدی شەعبیش هەڵبوەشێنرێتەوە، بە هۆکاری ئەوەی گرووپەکان چالاکی دەرەوەی سنوور ئەنجام دەدەن و ئەوەش مەترسی لەسەر ئاسایشی عێراق دروستکردووە.
 
لێدوانی فەرمی: ئیبراهیم سەمیدعی، ڕاوێژکاری سەرۆکوەزیرانی عێراق لە چاوپێکەوتنێکدا ئاماژەی بەوەكرد، تا ئێستا ڕوانگەی شیعیی ئەوەیە کە حەشدی شەعبی دەزگای پاراستنی سیستمی سیاسیی عێراقە و لەم قۆناغەشدا یەکێکە لە هۆکارەکانی پاراستنی دۆخی ئەمنیی وڵات.
 
بەوتەی سەمیدعی، ئێستا بابەتی دەرهێنانی چەک لە دەستی گرووپە چەکدارەکانی عێراق گفتوگۆی لەسەر دەکرێت بەڵام هەموو کات ئەو بابەتە مەرجداربووە بە دۆسیەی کشانەوەی هێزەکانی ئەمریکا لە عێراق، ڕێکخستنی ڕێکارەکانی کشانەوەی ئەمریکاش لە ئەستۆی حکومەتی نوێ دەبێت.
 
لەلایەکی دیکەوە: ڕاوێژکارەکەی سوودانی باس لەوەکرد، لە ئاڤا میدیاوە بیستوویەتی کە هەندێک لە گرووپە چەکدارەکان ڕایانگەیاندووە کە ئەمریکییەکان بە ئامانج ناگرن، جەختیشیکردەوە کە هەڵوەشاندنەوەی گرووپەکان لە بەرنامەی حکومەت و وتارەکانی مەرجەعییەتدا هەیە، بۆیە گرنگە لە شێوەی گرووپی سیاسییدا هەوڵی خۆڕێکخستنەوە بدەن.