ڕێگریكردن لە گەندەڵی لە هەرێمی كوردستان دەكرێتە ئەلیكترۆنی

ئاڤا نیوز

بەرپرس و فەرمانگەکانی حکومەتی هەرێمی کوردستان سیستەمێکی نوێی بە ئەلیکترۆنیکردنی سەروەت و سامانیان پێدەناسێنرێت، ئەو کارەش بە هاوکاری کونسوڵخانەی بەریتانیا لە هەولێر و دەستەی دەستپاکيی لەژێر چاودێریی ڕێکخراوی شەفافیەتی نێودەوڵەتی بەڕێوەدەچێت.

بۆچی گرنگە: مەبەست لەم پرۆژەیە چڕبوونەوەی هەوڵەکانە بۆ بنبڕکردنی گەندەڵيی، لەکاتێکدا عێراق لە لیستی 20 وڵاتە گەندەڵەکانە و سەرۆکی دەستەی دەستپاکی هەرێمی کوردستانیش ڕایگەیاند، لە هەرێمی کوردستان کاری زۆر ماوە بۆ ڕێگریکردن لێی.

ئەوەی پێویستە بیزانیت: لە ڕێوڕەسمەکەدا دەستەی دەستپاکی هەرێمی کوردستان، دەستەی وەبەرهێنان، ژمارەیەک لە وەزیرەکان، بەرپرسە ئیداری و حکومیيەکان، پارێزگاری هەولێر و نوێنەری کونسوڵخانەکان ئامادەبوون، ڕێکخراوی شەفافیەتی نێودەوڵەتی پێناسەی بۆ گەندەڵيی کرد و ناوەڕۆکی ڕێککەوتنامەی نەتەوەیەکگرتوەکانی لەبارەی گەندەڵی بۆ ئامادەبووان خستەڕوو.

 

لێدوانى فەرمی: ئەحمەد ئەنوەر، سەرۆکی دەستەی دەستپاکی هەرێمی کوردستان بە ئاڤا نیوزی گوت: هەمووساڵێک فۆرم پڕدەکەینەوە بۆ بەرپرسە باڵاکان دەبێت سەروەت و سامانی خۆیان ئاشکرابکەن، بەهەماهەنگیی لەگەڵ حکومەتی بەریتانیا سیستەمێکی دیجیتاڵی دانراوە، تائێستا 230 کەیس دراون بەدادگە و 800 بۆ 900  کەیسیش لەژێر لێکۆڵینەوەدان.