ئاڤا گەندەڵییەکی بەنزینخانەکانی کوردستان و بەتایبەت هەولێر ئاشکرا دەکات

ئاڤا نیوز

 

ئاڤا زانیویەتی بەشێك لەو بەنزینخانانەی بەنزینی حكومییان پێ دەدرێت تا بە 750 دینار بە شۆفێرانی بدەن، بەنزینەكە دابەش ناكەن و بە ئەنقەست دەیهێڵنەوە و دواتر بە ناوی بەنزینی محەسەن و سووپەر بە نرخی دوو ئەوەندە دەیفرۆشنەوە.

 

وێنە گەورەكە: وەزارەتی سامانە سروشتییەكانی هەرێمی كوردستان، لەڕێگەی بەڕێوەبەرایەتیی گشتی وەبەرهێنانی كانزایی ڕۆژانە بەنزینی بەرهەمهێنراوی كۆمپانیای كار بەنرخی پاڵپشتیكراو بە بەنزینخانەكان دەدات، ئەوانیش هەر لیترێك بە نرخی 750 دینار بە شۆفێران دەدەنەوە.

 

گرفتەكە چییە: بەشێك لە بەنزینخانەكان كاتێك بەنزینی  حکومی (750 دیناری) وەردەگرن، بەنرخی پاڵپشتیكراو بە هاووڵاتیان نادەن و دەیهێڵنەوە كە زۆرجار سڕەی دوور و درێژی پێش بەنزینخانەكانی لێ دروست دەبێت، یاخود دوای چەند كاتژمێرێك لەسڕەگرتن بە شۆفێران دەڵێن بەنزین نەماوە و بەیانی دابەش دەكرێت.

 

زانیاریی تایبەت: ئاڤا ئەوەی زانیوە، بەڕێوەبەرایەتیی گشتی وەبەرهێنانی كانزایی لە وەزارەتی سامانە سروشتییەكان بەو قۆرخكارییە ئاگاداركراوەتەوە، بەمەبەستی ئەوەی بەدواداچوون بكرێت لەو بابەتە و سزاى سـەرپێچیکـاران بدرێت لـە کـاتـى بـوونـى حـاڵـەتـى هـاوشـێوە، کە پێچەوانەی یاسا و ڕێنماییەكانە.

 

لێدوانی فەرمی: نەبەز عەبدولحەمید، قایمقامی قەزای هەولێر تایبەت بە ئاڤا میدیا ڕایگەیاند: "هەرچەندە بابەتی بەرهەمهێنان و دابەشكردنی بەنزین بەسەر بەنزینخانەكان، بەڕێوەبەرایەتیی وەبەرهێنانی كانزایی خۆی سەرپەرشتی دەكات، سەرەڕای ئەوەش لە هەر شوێنێك سەرپێچی هەبێت لیژنەكانی قایمقامیەتی هەولێر ئاگاداردەكەنەوە و ئێمەش دوای بەدواداچوون هاوكارییان دەكەین و ڕێوشوێنی پێویست بەرامبەر بەنزینخانە كەمتەرخەكان دەگرینە بەر".