ئاڤا زانیاری لەبارەی چارەسەری کێشەی زیندانییە سیاسییەکەی هەڵەبجە دەخاتەڕوو

ئاڤا نیوز

 

دوای ئەوەی لە ئاڤا نیوز کێشەی وارسی زیندانییەکی سیاسیی بڵاوکرایەوە، وەزارەتی شەهیدان و کاروباری ئەنفالکراوان و زیندانیانی سیاسیی بەدواداچوونی بۆ کردووە، دەڵێن "ناو و کۆدی ئەو زیندانییە سیاسییە هەیە و کێشەی نییە".
 
چیرۆکی سەرەکی: حسێن عەلی محەممەد ئەحمەد، بە ڕەسەن خەڵکی پارێزگای هەڵەبجەیە، لە ساڵانی 1982 بۆ 1983 لە زیندانی تۆپزاوە لە باشووری کەرکووک لەگەڵ ژمارەیەک خەڵکی سنوورەکەی بۆ ماوەی شەش مانگ بەندکران، دوای ئەشکەنجەیەکی زۆر ئازادکران، ئەوەبوو محەممەد وارسی ئەو زیندانییە سیاسییە لە ئاڤا نیوزەوە داوای گەڕاندنەوەی مافەکانی کرد.

 

لێدوانی فەرمی: سەرچاوەیەک لە بەڕێوەبەرایەتیی گشتیی زیندانییە سیاسییەکانی سەر بە وەزارەتی کاروباری شەهیدان و ئەنفالکراوان بە ئاڤا نیوزی ڕاگەیاند: حسێن عەلی محەممەد لە وەجبەی 12ی زیندانە سیاسییەکانە، کۆدەکەی 17 هەزار و 757ە و هیچ کێشەیەکی نییە.

 

زانیاریی زیاتر: وەجبەی یەک تاوەکو هەشتی زیندانییە سیاسییەکان مووچەیان بۆ بەستراوە، بەڵام وەجبەی نۆ تاوەکو 15 هێشتا مووچەیان نەبەستراوە.

 

زانیاریی بەدەستهاتوو: ئێستا وەجبەی نۆیی زیندانیانی سیاسیی لەلایەن دادوەرانەوە پێداچوونەوەیان بۆ دەکرێت، بۆ ئەوەی پەسەند بکرێت و موچەیان بۆ ببەسترێت، (حسێن عەلی محەممەد) لە وەجبەی 12ی زیندانە سیاسییەکانە و سێ قۆناغی لەپێشە بۆ ئەوەی جارێکی دیکە پێداچوونەوەی بۆ بکرێتەوە. 

 

لەلایەکی دیکەوە: ئەحمەد ڕەسوڵ، بەڕێوەبەری گشتیی خزمەتگوزاری کەسوکاری شەهیدان و زیندانیانی سیاسیی، بە ئاڤا نیوزی ڕاگەیاند: وەجبەی 9 تاوەکو 15ی گیراوان و زیندانیانی سیاسیی پەسەند کراون و دادوەریان بینیوە و ڕێکارەکانیان تەواو کراوە، ئەو پێداچوونەوەی ئێستا دەکرێت هیچ لە بابەتەکە ناگۆڕێت، چونکە سەرجەم ڕێکارە یاسایی و ژمێریارییەکانیان تەواو بووە، بەهۆی قەیرانی داراییەوە مووچەی مانگانەیان بۆ نەبەستراوە.

 

ئەوەی پێویستە بیزانیت: 15 وەجبەی زیندانیانی سیاسیی هەیە، لە 25 هەزار و 807 کەس پێکهاتووە و پشتڕاستکراونەتەوە.