ئاڤا زانیاری نوێ لەبارەی مووچەی مانگەكانی 7 و 8ـی مامۆستایانی گرێبەست بڵاودەكاتەوە

ئاڤا نیوز

 

ئاڤا بەدواداچوون بۆ هۆكاری دابەش نەكردنی مووچەی مانگی حەوت و هەشتی مامۆستایانی گرێبەست لە هەولێر و دهۆك كرد، زانیویەتی وەزارەتی پەروەردە و بەڕێوەبەرایەتیی گشتی پەروەردە ئێستا سەرقاڵی چارەسەركردنی ئەو گرفتەن و چاوەڕوانی گەنجینەكانی هەولێر و دهۆكن بیكەنە چەكی بانكی و ئەوانیش بچن چەكی خەرجكردنەكە وەربگرن.

 

وێنە گەورەكە: مامۆستایانی گرێبەست لە پارێزگاکانی هەولێر و دهۆک، داوایان لە ئاڤا میدیا کرد کە بەدواداچوون بۆ گرفتی وەرنەگرتنی مووچەی مانگەكانی 7 و 8 بكەن و دەنگیان بە حکومەتی هەرێمی کوردستان بگەیەنێت، بۆ ئەوەی هاوشێوەی سلێمانی شایستەی داراییان وەربگرن، هاوکات داوا دەکەن مووچەی مانگی 10ـیان لەگەڵ مووچەی وەزارەتی پەروەردە بۆ خەرج بکرێت، بەوپێیەی ماوەی 180ڕۆژە تەنیا 400 هەزاریان وەرگرتووە و دۆخی دارایی مامۆستایان لەوپەڕی خراپیدایە.

 

لێدوانی فەرمی: عومەر محەممەد، بەڕێوەبەری ژمێریاری لە بەڕێوەبەرایەتی پەروەردەی هەولێر بە ئاڤا نیوزی ڕاگەیاند، هۆكاری خەرج نەكردنی ئەو دوو موچەیە بۆ ئەوە دەگەڕێتەوە، كاتی خۆی وانەبێژان كە بوونە گرێبەست خۆیان داوایانكرد ڕاستەوخۆ لەگەڵ هەمیشەییەكان مووچەی مانگی 9 وەربگرن، ئەوكات ڕێكارەكانی خەرجكردنی لە گەنجینە بۆ مووچەكانی پێشوویان نەكرا.

ڕوونیشی كردەوە؛ ئێستا وەزارەتی پەروەردە و بەڕێوەبەرایەتیی گشتیی پەروەردە چاوەڕێی گەنجینەكانی ئەو دوو پارێزگایە دەكەن تا مووچەكانیان بكرێتە چەكی بانكی و بچن پارەكە وەربگرن و دابەشی بكەن.