ئەمریکا هۆشداریی بە ئیسرائیل دەدات: غەززە دەبێتە مەقادیشۆ

ئاڤا نیوز

بەرپرسانی ئەمریکا هۆشداری دەدەنە ئیسرائیل ئەفسەرانی پۆلیسی کەرتی غەززە نەکەنە ئامانج، تا ئاژاوە و بێسەروبەری بڵاونەبێتەوە و غەززە نەبێتە مەقادیشۆ.

چیرۆکی سەرەکی: هێرشی ئیسرائیل بۆ سەر کەرتی غەززە بەردەوامە. هێزەکانی ئیسرائیل ئەو پۆلیسە مەدەنییانەش دەکەنە ئامانج کە ئەرکیان دابینکردنی ئاسایش و رێکوپێکیی شارەکەیە، ئەمەش مەترسی دروستکردووە. 

وێنە گەورەکە: ئەمریکا هۆشداری داوەتە ئیسرائیل لە ئەگەری نەمانی پۆلیسی مەدەنیی غەززە، بۆشایی ئەمنی دروست دەبێت و بێسەروبەری بڵاودەبێتەوە. ئەوکات کەس نامێنێت پارێزگاری لە کاروانەکانی یارمەتییە مرۆییەکان بکات؛ ئەمەش قەیرانی مرۆیی کەرتەکە قووڵتر دەکاتەوە.

لێدوانی فەرمی: لۆید ئوستین، وەزیری بەرگریی ئەمریکا ئەم نیگەرانییانەی ئەمریکای گەیاندووەتە یۆئاڤ گالانت، هاوتا ئیسرائیلییەکەی و، جەختی لەسەر دۆزینەوەی ڕێگایەک کردووەتەوە بۆ دابینکردنی ئاسایش بۆ کاروانی یارمەتییە مرۆییەکان.

ئەمەش بزانە: بەرپرسانی ئەمریکا دۆخی چاوەڕوانکراوی غەززەیان بە مەقادیشۆ چوواندووە. مەقادیشۆ پایتەختی سۆماڵە و سەردەمانێک بە بێ یاساترین و بێسەروبەرترین شاری جیهان دەناسرا.