ئاڤا بەدواداچوون بۆ گرفتی فەرمانبەرانی گرێبەست دەکات

ئاڤا نیوز

 

 

بەپێی بە دواداچوونەکانی  ئاڤا، بەغدا تەنیا ڕەزامەندی لەسەر بەهەمیشەییكردنی فەرمانبەرانی گرێبەستی میلاك داوە و جۆرەكانی دیكەی گرێبەست کە ژمارەیان زیاتر لە 10 هەزار فەرمانبەرە، تاوەكو ئێستا چارەنووسیان بە هەڵواسراوی ماوەتەوە.

 

وێنە گەورەکە: ڕۆژی 25-9-2024، سەرۆكوەزیران مەسرور بارزانی، بڕیاری بەهەمیشەییكردنی فەرمانبەرانی گرێبەستی دا، بەپێی زانیارییەكان ژمارەیان زیاتر لە 31 هەزار فەرمانبەری گرێبەستە.

 

زانیاریی بەدەستهاتوو: فەرمانبەرانی گرێبەست چەند جۆرێكن، ئەوانیش گرێبەستی "میلاك یان ئاسایی، گرێبەستی داهات، پەرەپێدان، گەشەپێدان، کرێی ڕۆژانە". بەپێی نوێترین بەدواداچوونی ئاڤا دەركەوتووە، بەغدا تەنیا ڕەزامەندە لەسەر بەهەمیشەییكردنی فەرمانبەرانی گرێبەستی میلاك و مووچەی ئەوان خەرج دەكات، چونكە لە یاسای بودجەدا تەنیا پارەی مووچەی ئەوان تەرخان كراوە، بە مەرجێك سێ ساڵیان زیاتر خزمەت هەبێت.

 

ئەوەی پێویستە بیزانیت: ئەو فەرمانبەرانەی كە گرێبەستی میلاك نین، واتە جۆرەكانی دیكەی گرێبەستن، ژمارەیان زیاتر لە 10 هەزار فەرمانبەرە، تاوەكو ئێستا چارەنووسیان بە هەڵواسراوی ماوەتەوە.

 

زانیاریی زیاتر: یان دەبێت سەرجەم جۆرەكانی گرێبەست لە یاسای بودجەی عێراق جێیان بۆ بكرێتەوە، ئەمەش ئەركی پەرلەمانی عێراقە بە ڕەزامەندی ئەنجوومەنی وەزیرانی عێراق، یانیش دەبێت گرێبەستی ئەو فەرمانبەرانە بگۆڕدرێت كە میلاك نین و بكرێنە میلاك، دواتر ڕەزامەندیی وەزارەتیی دارایی عێراقیان بۆ وەربگیرێت.

 

چارەسەرەکان: لایەنە پەیوەندیدارەكانی حكومەتی هەرێمی كوردستان سەرقاڵی چارەسەركردنی گرفتەكەن، ئەویش لە ڕێگەی گۆڕینی گرێبەستەكانی داهات، پەرەپێدان، گەشەپێدان، کرێی ڕۆژانە بۆ گرێبەستی میلاك، کە ئەو فەرمانبەرانە دابەش بوونە بەسەر وەزارەتەكان و زۆرینەیان لە تەندروستی و كارەبا و شارەوانین.

 

ژمارەکان وادەڵێن: وەزارەتی تەندروستی كە زیاتر لە 1400 فەرمانبەری گرێبەستی پەرەپێدانی هەیە و بەشێکیان 16 بۆ 17 ساڵ خزمەتی هەیە، نووسراوێكی بۆ ئەنجوومەنی وەزیران ناردووە بۆ ئەوەی گرێبەستەكانیان بگۆڕدرێت بۆ میلاك یان گرێبەستی دارایی، بۆ ئەوەی لە قۆناغی دواتر نووسراو ئاراستەی بەغدا بكرێت و ڕەزامەندیی خەرجكردنی مووچەی هەمیشەییان بۆ دەربچێت، بە هەمان شێوە چەند وەزارەتێكی دیكەش لە هەوڵدان.

 

زانیاریی تایبەت: ئاڤا لە سەرچاوەی باڵاوە زانیویەتی، ئەگەری زۆر هەیە لە كۆبوونەوەی داهاتووی ئەنجوومەنی وەزیران بابەتی چارەسەركردنی گرفتی ئەو فەرمانبەرانە یەكێك بێت لە بابەتە سەرەكییەكان و گفتوگۆی لەبارەیەوە بكرێت، وەزیرە پەیوەندیدارەكانیش بەنیازن پێشنیازی خۆیان بۆ چارەسەركردن گرفتە بخەنەڕوو.