شاندی پارتی دیموکراتی کوردستان سەردانی لایەنەکان دەکات

ئاڤا نیوز

لە دوای پەسەندکردنی ئەنجامی هەڵبژاردنی خولی شەشەمی پەرلەمانی کوردستان لەلایەن کۆمیسیۆنی باڵای سەربەخۆی هەڵبژاردنەکانی عێراق، چاوەڕوان دەکرێت لەم هەفتەیەوە شاندی لایەنە سیاسییەکان بە مەبەستی تاوتوێکردنی پێکهێنانی حکومەت سەردانی یەکتری بکەن. 

 

وێنە گەورەکە: چاوەڕوان دەکرێت بەمزووانە سەرۆکایەتیی هەرێمی کوردستان ڕۆژی یەکەم دانیشتنی پەرلەمان دیاری بکات، لەگەڵ ئەوەشدا لایەنە سیاسییەکان بۆ پێکهێنانی کابینەی 10یەمی حکومەت پێویستییان بە ڕێککەوتن هەیە لەگەڵ لایەنەکانی دیکە بۆ ئەو مەبەستەش دەست بە سەردان و گفتوگۆکانیان دەکەنەوە.

 

لێدوانی فەرمی: عارف ڕوشدی، ڕاوێژکاری مەکتەب سیاسیی پارتی دیموکراتی کوردستان، بە ئاڤا نیوزی ڕاگەیاند: لە ئەمڕۆوە شاندی پارتی سەردانی لایەنە سیاسییەکان دەکەن و گفتوگۆکان دەستپێدەکەنەوە.

 

سەبارەت بە بەرنامەی سەردانەکان، ڕاوێژکارەکەی مەکتەبی سیاسیی پارتی دەڵێت؛ سەردانی هەموو لایەنەکان دەکەین، دەمانەوێت هەمووان بە ڕوحیەتی کوردانە بێنە پێشەوە تاوەکو حکومەتێکی نوێ دروست بکەین، کارنامەمان یەک حکومەت، یەک پەرلەمان، یەک هێزی پێشمەرگەیە، هیواخوازین هەموو لایەنە سیاسییەکان لە ئاستی ئەو بەرپرسیاریەتییە دابن.

 

زانیاریی زیاتر: شاندەکەی پارتی لە چوار کەسی پێکدێت بە سەرۆکایەتیی هۆشیار زێباری، ئەندامی مەکتەب سیاسی ئەو حیزبە، کە ئەرکی سەردانیکردنی لایەنە سیاسییەکانیان پێسپێردراوە بە مەبەستی گفتوگۆکردن لەبارەی پێکهێنانی کابینەی 10ی حکومەتی هەرێمی کوردستان. 

 

لەلایەکی دیکەوە: سالار عوسمان، ئەندامی کۆمیتەی ناوەندی پارتی، پێشتر بە ئاڤا نیوزی ڕاگەیاندبوو : وەکو پارتی سەردانی هەموو لایەنەکان دەکەین، ئەوانەی دەنگی زۆر یان کەمیان بەدەستهێناوە، ڕۆژی دووشەممەش یەکەم کۆبوونەوەمان لە سلێمانی دەبێت.

 

ئەمەش بزانە: شاندەکەی پارتی پێکهاتووە لە هۆشیار زێباری، پشتیوان سادق، دڵشاد شەهاب، ئومێد سەباح، شاندەکە ئەرکی سەردانی لایەنەکانیان پێ سپێردراوە.