14 بڕیار لە وەزارەتی داراییەوە لەبارەی بەهەمیشەییکردنی فەرمانبەرانی گرێبەست

ئاڤا نیوز

 

وەزارەتی دارایی و ئابووریی هەرێمی کوردستان 14 بڕیار لەبارەی بەهەمیشەییکردنی فەرمانبەرانی گرێبەست بۆ دامودەزگاکان دەگشتێنێت، لە یەکێک لە ڕێنماییەکاندا هاتووە کە فەرمانبەران بەو بڕوانامەیە بە هەمیشەیی دەکرێن کە پێی کراونە گرێبەست، پێش یان پاش ئەو پرۆسەیە هیچ بڕوانامەیەک هەژمارناکرێت.

 

وێنە گەورەکە: لە هەرێمی كوردستان زیاتر لە 31 هەزار فەرمانبەرانی گرێبەست هەیە و 7%ی كۆی گشتیی مووچەخۆرانی شارستانی پێكدێنن، ئەنجوومەنی وەزیران ڕەزامەندی لەسەر بە گرێبەستکردنیان داوە و  بەهەمیشەییکردنیان لەسەر میلاکی وەزارەت و لایەنەکانی نەبەستراو بە وەزارەت لە هەرێمی کوردستان دەبێت.

 

بڕیارەکان چین: ئەو بڕیارانەی وەزارەتی دارایی و ئابووری کە لەبارەی بەهەمیشەیی کردنی فەرمانبەرانی گرێبەست بۆ دام و دەزگاکانی حکومەتی هەرێمی کوردستان گشتاندوویەتی لە 14 خاڵدا چڕ دەبنەوە.

 

1.ڕەچاوکردنی سرووشتی ئەو خزمەتگوزارییانەی فەرمانبەرەکە پێشکەشی دەکات، بوار بەهەمیشەیی کردنی دەدات. واتا  سرووشتی کارەکە وا بخوازێت لە ئەرکەکەی بەردەوام بێت.

2.کار بەو بڕوانامەیە دەکرێت کە پێی کراونەتە گرێبەست، پێش یان پێش بە گرێبەستکردنیان کار بەهیچ بڕوانامەیەکی دیکە ناکرێت.

3.پێویستە فەرمانبەرەکە بەلایەنی کەمەوە سێ ساڵ خزمەتی هەبێت و خزمەتی گرێبەستی لە 18 ساڵییەوە دەستپێدەکات.

4.هەر فەرمانبەرێک بە هەمیشەیی بکرێت، پێویستە لە فەرمانگەکەی ڕاژەی هەبێت.

5.ڕەچاوی تەمەنی بکرێت، واتا حیسابی ئەوە بکرێت کە بتوانێت 20 ساڵ خزمەت بکات.

6.دەبێت لە کاتی دامەزراندن 18 ساڵی تەواو کردبێت.

7.مەرجە لەلایەن وەزارەتی داراییەوە فەرمانبەرەکە دامەزراندنی بە گرێبەست و بەهەمیشەیی کردنی پەسەند کرابێت.

8.دوای بەهەمیشەیی کردنی نابێت تاوەکو سێ ساڵ داوای گواستنەوەی ڕاژە بکات.

9.پێویستە هەڵگری ڕەگەزنامەی عێراقی بێت.

10.هەر فەرمانبەرێک کرا بە هەمیشەیی گرێبەستەکەی تەواو دەبێت و کەس لە شوێنی دانانرێت.

11.دەبێت سەرجەم مەرجەکانی هاتوو لە یاسای ڕاژەی شارستانی ژمارە 24 ساڵی 1960ی بەرکار لە هەرێمی کوردستان تێیدا جێبەجێ بکرێت.

12.پێویستە لە پڕۆسەی بایۆمتری خۆی تۆماربکات و UPNی هەبێت.

13.ئەوانەی ئەو خاڵانەی  سەرەوە دەیانگرێتەوە پێویستە لەسەر وەزارەت و فەرمانگەکانی نەبەستراو بە لیست دوای وردبینی ئاراستەی وەزارەتی دارایی بکات.

14.بەڕەچاوکردنی بڕیاری ئەنجوومەنی وەزیران سەرجەم خاڵەکانی سەرەوە بەپێی لیست هاوپێچ دەکرێت و  دوای کۆمەڵێک ڕێکاری وردبینی و بەدواداچوون، لە ئەگەری هەر کەم کوڕییەک خۆیان بەرپرسیار دەبن، لێپێچینەوەیان لێدەکرێت.

 

دەقی نووسراوەکانی وەزارەتی دارایی و ئابووری: