تاوەکو ساڵی 2026 سەرجەم هێزەکانی پێشمەرگە یەکدەخرێن

ئاڤا نیوز

پرۆسەی چاکسازی، ڕێکخستنەوە و یەکخستنەوەی هێزەکانی پێشمەرگەی کوردستان بەردەوامە لەماوەی ساڵێکدا شەش فیرقەی وەزارەتی پێشمەرگە یەکخراونەتەوە.

 

وێنە گەورەکە: نزیکەی 30 لیوا لە چوارچێوەی چاکسازییەکانی حکومەت پێکهێنراون، پرۆسەكە لە ژێر سەرپەرشتیی هێزەکانی هاوپەیمانان و وەزارەتی کاروباری پێشمەرگە و بەپێی ئەو پلانەی بۆی دانراوە، تا 2026 لە تەواوی هێزەكانی هەرێمی كوردستان بەردەوام دەبێت.

 

لێدوانی فەرمی: لیوا هۆشمەند حەیدەر لەوەزارەتی پێشمەرگە، جێگری سەرۆکی ئەرکانی پێشمەرگە لە کۆنگرەیەکی ڕۆژنامەوانیدا گوتی، "فیرقەی 5 و 6ـی وەزارەتی پێشمەرگە لە بەرنامەی کاردایە بۆ یەکخستنەوەیان، تاوەکو ساڵی 2026 هیچ هێزێک لەدەرەوەی وەزارەتی پێشمەرگە نامێنێت و سەرجەمان یەکدەخرێنەوە."

 

لەلایەکی دیکەوە: نێچیرڤان بارزانی، سەرۆکی هەرێمی کوردستان لە ئاهەنگی دەرچوونی خوێندکارانی خولی چوارەمی پێگەیاندنی ئەفسەران لە کۆلێژی سەربازی قەڵاچوالان، سەبارەت بە یەکخستنەوەی هێزەکانی پێشمەرگە گوتی، "باوەڕێکی قوڵمان هەیە پێویستە هێزی پێشمەرگە و هێزە چەکدارەکانمان  دامەزراوەیەکی  نیشتمانی، پێشەیی و سەبەخۆ بن، دووربن لەهەر ململانێ و ناکۆکییەکی حیزبە."