داواكاری گشتی: ڕێگای عەربەت - سلێمانی بەتەواوی خەسڵەتی ڕێگای سەرەكی لەدەستداوە

ئاڤا نیوز

 

داواكاری گشتیی لەسەر خراپی بەشێك لە ڕێگاوبانی سنووری پارێزگای سلێمانی دێتەدەنگ و داوای خێرا نۆژەنكردنەوەیان دەکات.

 

وێنە گەورەكە: لەپێناو سەلامەتیی گشتیی و پاراستنی گیانی هاووڵاتییان كە لە ئەركە سەرەكییەكانی دەزگای داواكاریی گشتییە، فەرمانگەی داواكاریی گشتیی سلێمانی لەسەر ڕاسپاردەی سەرۆكایەتی داواكاریی گشتیی هەرێمی كوردستان، بەدواداچوونی بۆ ڕێگەی جووتسایدی بازگەی عەربەت بۆ سلێمانی كردووە و دەركەوتووە، ئەو ڕێگایە بەتەواوی خەسڵەتەكانی ڕێگای سەرەكی لەدەستداوە و هاتووچۆی ئۆتۆمبێل ئەستەم بووە.

 

ڕاگەیێنراوی فەرمی: دەزگای داواكاریی گشتیی هەرێمی كوردستان بەنووسراوێكی فەرمی كە وێنەیەكی لای ئاڤا نیوز پارێزراوە، ئاڕاستەی سەرۆكایەتیی دیوانی ئەنجوومەنیی وەزیران كراوە و تیایدا داوا دەكرێت لەزووترین كاتدا ڕێگەی جووتسایدی عەربەت-سلێمانی نۆژەنبكرێتەوە و، هەریەك لە وەزارەتی ئاوەدانكردنەوە و نیشتەجێكردن و وەزارەتی شارەوانی و گەشتوگوزاری لێ ئاگاداربكرێتەوە.

 

گرنگی بابەتەكە: خراپی ڕێگاوبانی سنووری پارێزگای سلێمانی و ئیدارەی گەرمیان، ئەگەری ڕووداوی هاتوچۆی زیادكردووە، لەپێناو ڕێگریكردن لە ڕووداوی نەخوازراو و دڵتەزێن، داواكاری گشتی بەپێویستی دەزانێت دامودەزگا پەیوەندیدارەكان چارەسەری گونجاو پەیڕەوبكەن.