ئەمریکا داوایەک لە سەرۆکوەزیرانی عێراق دەکات

ئاڤا نیوز 

 

 ئەمریکا داوا لە سەرۆکوەزیرانی عێراق دەکات کۆنتڕۆڵی گرووپە چەکدارەکان بکات کە لە خاکی عێراقەوە هێرشدەکەنە سەر ئیسرائیل و بنکەکانی ئەمریکا، هاوکات داوای پاراستنی نێردە دیپلۆماسییەکانی وڵاتەکەشی لە بەغدا دەکات.

 

وێنە گەورەکە: لەگەڵ بەردەوامی هێرشەکانی ئیسرائیل بۆسەر غەززە و لوبنان، هێرشی گرووپە چەکدارەکانی عێراقیش بۆسەر ئیسرائیل و بنکەکانی ئەمریکا لە عێراق و سووریا بەردەوامە، هەوڵەکانی حکومەتی عێراقیش بۆ ڕاگرتنی هێرشەکان تائێستا بێ ئەنجام بووە.

 

ڕاگەیێنراوی فەرمی: وەزارەتی دەرەوەی ئەمریکا بڵاویکردەوە، ئەمڕۆ ئەنتۆنی بلینکن، وەزیری دەرەوەی وڵاتەکەیان پەیوەندییەکی تەلەفۆنی لەگەڵ محەممەد شیاع سوودانی، سەرۆکوەزیرانی عێراق ئەنجامداوە و تیایدا داوای لە حکومەتی عێراق کردووە پابەندی ئەرکەکانی بێت بۆ پاراستنی ئەمریکییەکان و، ئەوانەش ڕووبەڕووی یاسا بکاتەوە کە هێزەکانی ئەمریکا لە عێراق و سووریا دەکەنە ئامانج.

 

لە لایەکی دیکەوە: وەزیری دەرەوەی ئەمریکا بەگرنگی زانیووە عێراق نەبێتە بەشێک لە گرژییە هەرێمییەکانی ناوچەکە، بەپێویستیشی زانیووە عێراق کۆنتڕۆڵی گرووپە چەکدارەکان بکات کە لە خاکی عێراقەوە هێرش بۆسەر وڵاتان و بنکە سەربازییەکان ئەنجام دەدەن.

 

ئەوەش بزانە: بەگوێرەی ڕاگەیێنراوەکە، وەزیری دەرەوەی ئەمریکا و سەرۆکوەزیرانی عێراق هاوڕابوون کە بۆ دۆسییە هەرێمییەکانی ناوچەکە بەردەوام لە گفتوگۆ و ڕاوێژدابن، جەختیشیان لە بەهێزکردنی هاوبەشی ستراتیژیی نێوان بەغدا و واشنتن کردووەتەوە.