سریلانكا لەبەر بێ پارەیی بە چا قەرزەكانی بە ئێران دەداتەوە

ئاڤا نیوز

سریلانکا ڕایگەیاند بە بەهای 20 ملیۆن دۆلار چای ڕەوانەی ئێران کردووە لەبەرامبەر ئەو قەرزەی لەسەر کڕینی نەوتی ئێران لەسەری کەڵەکەبووە.

وێنە گەورەكە: لە ماوەی چەند ساڵی ڕابردوو، سریلانكا بە بەهای 251 ملیۆن دۆلار نەوتی لە ئێران كڕیوە، بەڵام بەهۆی كیێشە داراییەكان و هەڵئاوسانە ئابووریەكانەوە، وڵاتەکە ناتوانێت بە پارە قەرزەكانی بداتەوە، بۆیە لەگەڵ ئێران ڕێككەوتووە بە چا قەرزەكانی بداتەوە و لە یەکەم کاروانیشدا بە بەهای 20 ملیۆن دۆلار چای ڕەوانەی ئێران کرد.

لێدوانی فەرمی: نووسینگەی دینش گوناواردینا، سەرۆکوەزیرانی سریلانکا، دوای کۆبوونەوەی لەگەڵ حوسێن ئەمیر عەبدوڵاهیان، وەزیری دەرەوەی ئێران ڕایگەیاند، تاران "قایلبوونی" خۆی لەبارەی ڕێککەوتنەکەوە دەربڕیووە.

بابەتە ستراتیژییەکان: ڕێککەوتنەکە لە بەرژەوەندی هەردوولا واژۆکراوە چونکە کۆڵۆمبۆ پارەی قەرزەکانی نییە بیداتەوە، لەهەمانکاتیشدا تاران کێشەی ئەوەی هەیە دۆلاری نەختی لەبەردەست نییە بۆ کڕینی چا بەهۆی سزاکانی ئەمریکاوە.

ئەوەی پێویستە بیزانیت: چای سیلۆن بەشێکی زۆری بەرهەمی چای سریلانکا پێکدەهێنێت. بەپێی ئامارێکی ئاژانسی فرانس پرێس، نزیکەی نیوەی بەرهەمی چا لە ئێران کە ساڵی 2016 بەکارهێنراوە چای سیلۆن بووە.

باکگراوند: ڕێککەوتنەکە لە کۆتایی ساڵی 2021 واژۆکراوە، بەڵام دواکەوتنی جێبەجێکردنی بەهۆی قەیرانە داراییەکانی سریلانکاوە بوو.