شار لە پاشماوەی بانگەشەی هەڵبژاردن پاکدەکرێتەوە

ئاڤا نیوز

 

دوای کۆتایی هاتنی بانگەشەی هەڵبژاردن شارەوانی هەولێر هەڵمەتی پاککردنەوەی ژینگەی شاریان دەستپێکردووە و پۆستەر و وێنە و ئاڵای کاندیدەکان لێدەکەنەوە.

 

وێنە گەورەکە: بەڕێوەبەرایەتی خزمەتگوزاری و ژینگەپارێزی لە شارەوانی هەولێر، دوای ئەنجامدانی هەڵبژاردنی خولی شەشەمی پەرلەمانی کوردستان، هەڵمەتی پاککردنەوەی شەقامە سەرەکییەکان و دوورگە ناوەندییەکانی ناو شاری هەولێریان دەستپێکردووە، تا ئێستاش بەردەوامە.

 

لێدوانی فەرمی: ژیار جەلال، بەڕێوەبەری خزمەتگوزاری و ژینگە پارێزی لە شارەوانی هەولێر، بە ئاڤا نیوزی ڕاگەیاند: تاوەکو ئێستا 50%ی شەقامەکانی ناو شارمان لە بانگەشەی هەڵبژاردن پاککردۆتەوە، مەبەستمانە سیمای شار بگەڕێنینەوە بۆ دیمەنەکانی پێش هەڵبژاردن و پاکیان بکەینەوە.

 

لەلایەکی دیکەوە: ژیار جەلال دەڵێت: ڕۆژانە بە سوود وەرگرتن لە چۆڵی شەقامەکان و پشووی کاسبکارانی ناوچەکان، هەڵمەتەکانمان بە بەشداریی هێزی مرۆیی ژینگەپارێزان بەردەوامە.

 

ئەوەی پێویستە بیزانیت: بە پێی ڕێنماییەکانی کۆمیسیۆن دەبێت دوای 30 ڕۆژ لە کۆتایی هاتنی بانگەشەی هەڵبژاردن پێویستە حیزب و کاندیدەکان پۆستەرەکانیان لەسەر شەقام لاببەن، ئەگەر لای نەبەن وەزارەتی شارەوانی لەسەر تێچووی ئەوان لایان دەبات.