هاوپەیمانیی ئیدارەی کەرکووک پێکهێنرا؛ پارتی و یەکێتی بەشدارن

ئاڤا نیوز

 

لایەنە براوەکانی هەڵبژاردنی ئەنجوومەنی پارێزگای کەرکووک، هاوپەیمانیی ئیدارەی کەرکووکیان پێکهێنا کە پارتی و یەکێتی تێیدا بەشدارن، لەسەر چەند خاڵێک ڕێککەوتن.

 

ڕاگەیێنراوی فەرمی: محەممەد شیاع سوودانی، سەرۆكوەزیرانی عێراق، لەگەڵ لایەنە براوەكانی كەركووک تایبەت بە پێكهێنانی حكومەتی خۆجێیی كەركووک لە بەغدا كۆبووەوە، ڕێبەر ئەحمەد و شاخەوان عەبدوڵڵا لە پارتی و بافڵ تاڵەبانی لە یەکێتی ئامادەی کۆبوونەوەکە بوون. 

 

ڕێککەوتنەکە بەمشێوەیە: 

● ڕێککەوتن لەسەر ئەوەی بەرژەوەندیی خەڵکی کەرکووک لەبەرچاو بگیرێت، پێکەوەژیان بپارێزرێت، دەستوور چەتری هەمووان بێت.

 

● هاوبەشی و یەکدەنگی، دەبێتە بنەمای کاری هاوبەش لە پارێزگای کەرکووک.

 

● هاوپەیمانیی ئیدارەی کەرکووک لەسەرجەم هێزە براوەکانی ئەنجوومەنی پارێزگا پێکدەهێنرێت، ئەمە دەبێتە چەتری سیاسی، سەرۆکوەزیرانی عێراق سەرۆکایەتیی دانیشتنەکانی هاوپەیمانییەکە دەکات، تاوەکو پێکهێنانی حکومەتی خۆجێیی.

 

●ئامادەکاریی بەرنامەی ئیدارەی خۆجێیی لە کەرکووک، کە پەسەندکراوی هاوپەیمانییەتەکەیە و هەموویان پێوەی پابەند دەبن، ئیدارەی نوێی پارێزگاکە پابەند بێت و  بەگوێرەی شێوە و کاتی دیاریکراو و کردەیی جێبەجێ دەکرێت.

 ●هێزە سیاسییەکانی بەشدار لە کۆبوونەوەکەدا لە ماوەی حەوت ڕۆژدا نووسراوی کار پێشکەش دەکەن، دیدگای خۆیان بۆ ئامادەکردنی بەرنامەیەکی یەکگرتوو بە پارێزگا دەدەن، بۆ پێکهێنانی حکومەتی خۆجێیی.