حەماس کوژرانی سینواری پشتڕاست کردەوە

ئاڤا نیوز

 

بزووتنەوەی حەماسی فەلەستینی کوژرانی یەحیا سینوار، سەرۆکی مەکتەبی سیاسییەکەی لە غەززە پشتڕاست کردەوە.

 

وێنە گەورەکە: ڕۆژی پێنجشەممە، 17-10-2024، ئیسرائیل ڕایگەیاند، ڕۆژێک پێشتر سێ کەسی لە شاری ڕەفەح لە کەرتی غەززە کوشتووە، کە بە گوێرەی ئەنجامی پشکینینی دی ئێن ئەی و لێکۆڵینەوەکان دەرکەوتووە، یەکێک لە کوژراوەکان یەحیا سینوارە.

 

ڕاگەیێنراوی فەرمی: خەلیل حەییە، سەرکردەی حەماس لە کەرتی غەززە ڕاگەیاند، کوژرانی سینوار بەئازارە، بەڵام ئەمە حەماس بەهێزتر دەکات و لە کۆتاییشدا هەر حەماس سەردەکەوێت.

 

لەلایکی دیکەوە: ئەو بەرپرسەی حەماس لەبارەی ئاگربەست و ئازادکردنی بارمتە ئیسرائیلییەکان گوتی، "لە سەر ڕێگا و خەباتەکەمان بۆ دروستکردنی دەوڵەتی فەلەستین بەردەوام دەیبن. بە بێ ڕاگەیاندنی ئاگربەستی هەمیشەیی و پاشەکشەی تەواوەتیی سوپا لە غەززە، بارمتە ئیسرائیلییەکان ئازاد ناکرێن".

 

ئەمەش بزانە: ئیسرائیل لەو باوەڕەدایە کە سینوار داڕێژەری پلانی هێرشەکەی حەوتی ئۆکتۆبەری 2023ـیە و تاکە سەرکردەی حەماسە کە تەلئەڤیڤ ناوی لێناوە 'مێشکی جەنگ'.

 

ئەوەی پێویستە بیزانیت: دوای کوژرانی ئیسماعیل هەنیە، سەرۆکی مەکتەبی سیاسیی حەماس لە تاران لە ڕێکەوتی 31-7-2024، سینوار جێگەی گرتەوە.