لە دهۆک 114 شەقام دروست و نۆژەن دەکرێنەوە

ئاڤا نیوز

لە سنووری شارەوانیی دهۆك ئێستا 114 شەقام کاریان تێدا دەکرێت، بەشێکیان نۆژەن دەکرێنەوە و بەشێکیشیان دروست دەكرێن.

وێنە گەورەكە: كابینەی نۆیەمی حكومەت بەردەوامە لە پێشكەشكردنی پڕۆژە خزمەتگوزارییەكان لە شار و شارۆچكەكانی هەرێمی كوردستان، ڕێگاوبان و دروستكردنی شەقام یەكێكە لە پلانەكانی حکومەت و لەو ڕووەوە چەندین پڕۆژە جێبەجێكراون.

 
ڕاگەیێنراوی فەرمی: وەزارەتی شارەوانی و گەشتوگوزار ڕایگەیاند: پڕۆژەكان پێكهاتوون لە قیرتاوكردن و كۆنكرێتكردن و نۆژەنكردنەوەی شەقامە ناوخۆییەكان لە پێنج گەڕەكی سنووری سەرۆكایەتیی شارەوانیی دهۆك.

زانیاریی زیاتر: درێژی شەقامەكان 12 كیلۆمەترە و تا ئێستا بە ڕێژەی 50% كاركردن تێیاندا تەواو بووە، لە ماوەیەكی نزیكدا سەرجەم كارەكان تەواو دەكرێن.

باكگراوند: لە سەردەمی كابینەی نۆیەم تەنیا لەنێو شارەكان هەزار و 965 پڕۆژەی نۆژەنكردنەوە و دروستكردنی شەقام بە گوژمەی تریلیۆنێك و 863 ملیار دینار  جێبەجێكراون.