وەزارەتی دارایی هۆکاری دواکەوتنی دابەشکردنی مووچەی مانگی نۆ ئاشكرا دەکات

ئاڤا نیوز

 

گوتەبێژی وەزارەتی دارایی و ئابووری ڕایدەگەیێنێ، چاوەڕوانن تەواوکاری مووچە بگات و کورتهێنان نەمێێنێت، بۆ ئەوەی دەست بە دابەشکردنی مووچەی مانگی نۆ بکەن.

وێنە گەورەکە: وەزارەتی دارایی عێراق دوو گوژمەی بە بڕەکانی 598 ملیار و 329 ملیار دینار بۆ مووچەی مانگی نۆ ناردووە، بەڵام بەهۆی ئەوەی مووچەی مانگی هەشت 243 ملیار دینار کورتهێنان هەبوو، بەشێک لە مووچەی مانگی نۆ مووچەی مانگی هەشت خەرج کراوە، پێشتریش بەشێک لە مووچەی مانگی هەشت بۆ مانگی حەوت خەرج کرابوو.

 

ئەوەی پێویستە بیزانیت: حکومەتی هەرێمی کوردستان بۆ مووچەی هەر مانگێک بڕی 998 ملیار دیناری پێویستە، ئێستا وەزارەتی دارایی و ئابووریی هەرێمی کوردستان دەڵێت بۆ مووچەی مانگی نۆ بڕی 301 ملیار دینار کورتهێنانیان هەیە.

 

لێدوانی فەرمی: هونەر جەمال، گوتەبێژی وەزارەتی دارایی و ئابووری لە کۆنگرەیەکی ڕۆژنامەوانیدا ڕوونکردنەوەی دا و گوتی: "لە مانگی حەوت کێشە بۆ مووچە دروست بوو،  بەغدا مووچەی کۆمەڵێک چین و توێژی ڕاگرت بە کۆمەڵێک بیانووی جیاواز، مانگی حەوت زیاتر لە 600 ملیار دیناریان لێ بڕین، کاتێک ئەنجوومەنی وەزاری بۆ ئابووری هاتنە هەولێر ڕێککەوتین لە ماوەی چەند مانگێکدا تا کۆتایی ساڵ سەرجەم کێشە هونەرییەکانی لیستی مووچە چارەسەر بکرێن، ئەوانیش کردیانە ڕاسپاردە بۆ ئەنجوومەنی وەزیرانی عێراق بۆ ئەوەی ئەو پارانەی ڕاگیراون خەرج بکرێت، لە چەند هەفتەی ڕابردوودا بەشێکیان خەرج کرد".

 

زانیاریی زیاتر: بەگوتەی هونەر جەمال، ئێستا چوار توێژ ماون پارەیان بۆ خەرج بکرێت؛ لەمبارەیەوە گوتی: "بەشێکیان ئەوانەن بایۆمەترییان دووبارەبووەتەوە، بەشێکیان ناوی لەیەکچوومان هەیە لە چەند وەزارەتێک، ناوەکان بە چواری لەیەک دەچن، بەڵام ناوی دایک و تەمەنیان جیاوازە، ڕوونکردنەوەی پیویست دراوە و بەڵێنی خەرجکردنی مووچەیان دراوە، کێشەی مووچەخۆرانی وەزارەتی کارەبا  و پەرلەمان ماوە، ئەوەی پەرلەمان لەسەر زیادکردنی پێنج بۆ شەش ناو چەند مانگێکە مووچەیان بۆ نەهاتووە، لە وەزارەتی ناوخۆ بەشێکیان مووچەیان بۆ نەهاتووە و کێشەی ناوی لەیەکچوو هەیە، فەرمانبەرانی سنووری ماددەی 140 مووچەیان بۆ نەهاتووە و ڕوونکردنەوەمان پێداون".