مووچەی خانەنیشنانی یەکەی 70 ی سەر بە یەکێتی ڕادەگیرێت

ئاڤا نیوز

دابەشکردنی مووچەی خانەنیشنانی هێزەکانی یەکەی 70ی سەر بە یەکێتیی نیشتمانیی کوردستان ڕاگیرا. وەزارەتی دارایی دەڵێت لیستەکانیان کەموکوڕی زۆری تێدایە و چوار ساڵە ئامادەنین دۆسیەکانیان بۆ بنێرن.

بڕیاری فەرمی: بەپێی یاسای چاکسازی و ڕاپۆرتی تیمی هاوبەشی دیوانی چاودێریی دارایی هەرێمی کوردستان و عێراق، نابێت هیچ خانەنشینێک لە دەرەوەی بەڕێوبەرایەتیی گشتیی خانەنشینی مووچە وەربگرێت.

هۆکارە زانراوەکان: بەپێی بەدواداچوونی ئاڤا نیوز،  خانەنشینانی هێزەکانی یەکەی (70) تا ئێستا هیچ داتا و زانیاری و دۆسیەیەکیان لە بەڕێوبەرایەتیی گشتیی ژمێرکاری و بەڕێوبەرایەتیی گشتیی خانەنشینی هەرێمی کوردستان نییە، لە وەزارەتی دارایی عێراق و وەزارەتی دارایی هەرێمی کوررستانیش هیچ تەرخانکراوێکی داراییان بۆ نەکراوە.

زانیاریی تایبەت: دۆسیەی زۆربەیان کەموکوڕی زۆری تێدایە، بەجۆرێک بۆ خانەنیشنی هەر مووچەخۆرێکی سەربازی پێویستە مەرسومی هەرێمی بۆ دەربچێت، بەڵام بەشێکی زۆریان مەرسومی هەرێمییان نییە.

زانیاریی زیاتر: پێشتر وەزارەتی دارایی و ئابووریی هەرێمی کوردستان یەکەی 70 ئاگادارکردووەتەوە، بەرپرسیار نین لە دواکەوتن و نەدانی مووچەکانیان، بەڵکو پێویستە فەرماندەیی هێزەکانی یەکەی (70) کاربکات بۆ ئەوەی بەزووترین کات دۆسیەکانیان بگوازرێتەوە سەر بەڕێوەبەرایەتیی گشتیی خانەنیشنی.

ژمارەکان وادەڵێن: ژمارەی خانەنیشنانی هێزەکانی 70 نزیکەی  9 هەزار کەسە و گوژمەی مووچەیان  نزیکەی 4 ملیار دینارە.

چارەسەرەکان بەمشێوەیە: لە ڕاپۆرتی دیوانی چاودێریی دارایی عێراق بەڕوونی هاتووە، نابێت لە یەکەی 70 بەڕێوەبەرایەتیی خانەنشینی هەبێت و دەبێت دۆسیەکانیان بگوازرێتەوە بەڕێوەبەرایەتیی گشتیی خانەنشنی سەر بە وەزارەتی دارایی و ئابووریی حکومەتی هەرێمی کوردستان.