شایستە داراییەکانی مامۆستایانی وانەبێژ دابەش دەکرێت

ئاڤا نیوز 

شایستەی دارایی سەرجەم مامۆستایانی وانەبێژی هەرێمی کوردستان بە ناوچە کێشە لەسەرەکانیشەوە دابەش دەکرێت، هەروەها بڕیارە لە هەفتەی داهاتوو مووچەی مانگی 9 یەکەم مووچەیان وەک مامۆستای گرێبەستبوون لەگەڵ مووچەخۆران وەربگرن.

 

لێدوانی فەرمی: عومەر عەلی، بەڕێوەبەری گشتیی پەروەردەی دهۆک بە ئاڤا نیوزی گوت: "شایستەی دارایی مانگی شەشی سەرجەم وانەبێژانی هەرێمی کوردستان و ناوچەکانی دەرەوەی ئیدارەی هەرێمی کوردستان دابەش دەکرێت، چەکی بانکی ئامادە کراوە و تەنیا بڕیاری خەرجکردنی لەلای بانکەکانەوە ماوە و دەست بە دابەشکردنی دەکرێت". 

 

لەلایەکی دیکەوە: عەلی ڕەئووف، نوێنەری  مامۆستایانی وانەبێژ، بە ئاڤا نیوزی گوت ڕاگەیاند، "لە دهۆک و هەولێر شایستەی دارایی دابەش دەکرێت، بەشێک لە مامۆستاکان لە بانک و بەشەکەی دیکەیان لە پەروەردەکان وەریدەگرن، بەڵام سلێمانی بەهۆی نەبوونی سیولە دوادەکەوێت". 

 

زانیاری زیاتر: شایستە داراییەکان لە 250 هەزار دینارەوە تاوەکو 400 هەزار دینار دەستپێدەکات، ئەوەش بەگوێرەی بڕوانامە و شوێنی وانەبێژەکە دیاری کراون، بڕی 13 ملیار و 900 ملیۆن دینار بۆ شایستەی دارایی مامۆستایانی وانەبێژ تەرخان کراوە. 37 هەزار و 933 مامۆستای وانەبێژ لە هەرێمی کوردستان ناوچەکانی دەرەوەی ئیدارەی هەرێمی کوردستان لەم شایستە داراییە سوودمەند دەبن.