عەلی تەتەر: شۆڕشێکی کشتوکاڵی لە سنووری دهۆک دەستیپێکردووە

ئاڤا نیوز

بە ئامادەبوونی سەرۆکوەزیران مەسرور بارزانی گەورەترین پڕۆژەی ئاژەڵداریی و بەرهەمهێنانی شیر و ماست و پەنیر لە دهۆک کرایەوە، کە نزیکەی سێ هەزار مانگا لەخۆدەگرێت و ڕۆژانە 120 هەزار لیتر شیر بەرهەم دەهێنێت.

 

وێنە گەورەکە: پڕۆژەی کاڤین فارم وەک بەشێکە لە ستراتیژی هەمە جۆرکردنی سەرچاوەکانی داهات لە کابینەی نۆیەمی حکومەتی هەرێمی کوردستان، بەرهەمەکانی ئەو پڕۆژەیە کە شیرەمەنیی و گۆشت لەخۆدەگرێت لەپاڵ بەرهەمەکانی دیکە هەناردەی پارێزگاکانی عێراق دەكرێت.

 

لێدوانی فەرمی: عەلی تەتەر، پارێزگاری دهۆک ڕایگەیاند: ئەم پڕۆژەیە خزمەتێکی زۆر پێشکەش بە هاووڵاتییانی ناوچەکە دەکات و بەرهەمی جوتیارانمان هەناردەی دەرەوەی وڵات دەکرێت، ئێستا لە زۆر بواردا دهۆک لەپێش زۆرینەی پارێزگاکانی عێراقەوەیە، ئەمەش جێگەی پێزانینە کە سەرۆکوەزیران مەسرور بارزانی، بایەخی تەواویداوە بە سێکتەری کشتوکاڵی لە کوردستان و شۆڕشێکی لەو بوارەدا دروستکردووە. 

 

لەلایەکی دیکەوە: لە بەشێکی دیکەی گوتارەکەیدا پارێزگاری دهۆک تیشکی خستەسەر ئەوەی، کە زۆرترین پرۆژە ستراتیژییەکان لەسەر ئاستی عێراق لە دەڤەری ئەوانە و هەفتەی داهاتووش بەردی بناغەی پرۆژەی ڕێگای دهۆک- سێمێل دادەنرێت، هاوکات باسی لەوەکرد گەورەترین و پێشکەوتووترین تەرمیناڵ لەگەڵ گەورەترین پیشەسازی ئۆتۆمبێل هەر لە دهۆکە.