یەکێتی لە سلێمانی دەست بە "کامپەینی تۆقاندنی خەڵک بۆ کۆکردنەوەی دەنگ" دەکات

ئاڤا نیوز

یەكێتیی نیشتمانیی کوردستان "فشار لە خەڵکی ناوچەکانی ژێر دەسەڵاتی دەکات و بە شێوازێکی هەڕەشەئامێز  خەڵک ئاگادار دەکاتەوە دەنگی پێبدەن"، ئەمەش بووەتە مایەی نیگەرانی لای خەڵک .

زانیاریی بەدەستهاتوو: ڕێبوار فەتاح کە نووسەرێکی کوردە، کۆمەڵێک زانیاری لەوبارەیەوە لە پێگەی فەرمی خۆی لە  فەیسبووک بڵاوکردووەتەوە و نووسیویەتی: "یەكێتی لە سلێمانی کۆمەڵێک پرسیاری نابەجێ کە بە شێوازێکی هەڕەشەئامێز داڕێژراون، لە خەڵکی دەکات بۆ ئەو کەسانەی نزیکن لە خۆیانەوە، لە ئاسایشەوە تەلەفۆنیان بۆ دەکرێ یان بانگ دەکرێن یان خەڵک دەنێرنە سەریان، بە جۆرێك بە هەڕەشە پێیان دەگوترێ، دەبێ دەنگ بە یەکێتی بدەن."

زانیاریی زیاتر: بەگوتەی ئەو نووسەرە یەکێتی لەنێو خەڵکدا بڵاوی کردووەتەوە: "بەهۆی بارکۆدەوە دەزانن هەموو کەسێك دەنگ بە چ لایەنێك داوە، لەکاتێکدا ئەم لافە هیچ بنەمایەکی نییە؛ تەنیا دەیانەوێ ترس بخەنە دڵی خەڵکەوە تا دەنگ بەوان بدەن".

 

لەلایەکی دیکەوە: ئەمڕۆ یەکشەممە مەسرور بارزانی، جێگری سەرۆکی پارتی پەیامێکی ئاراستەی خەڵکی کوردستان بەگشتی و خەڵی سلێمانی و سنووری دەسەڵاتی یەکێتی بەتایبەت کرد کە لەسەر سندوقەکانی دەنگدان نەترسن.

مەسرور بارزانی گوتی: "لە هیچ کەسێک مەترسن، کەس خاوەنی ئێوە نییە، ئێوە گەلێکی ئازادن، خاوەنی شۆڕشی ئەیلوول و ئەم وڵاتە و بڕیارەکەتانن. هیچ دەسەڵاتێکی فاسد و گەندەڵ ناتوانێت ڕێگەتان لێ بگرێت بۆ ئەوەی ببنە خاوەنی بڕیارەکەتان".

 

باکگراوند: پێشتر کۆمیسیۆنی باڵای سەربەخۆی هەڵبژاردنەکانی عێراق ڕوونکردنەوەی پێویستی دابوو کە لەم هەڵبژاردنە دەنگدان 100% نهێنی دەبێت، تەنانەت بردنەژوورەوەی مۆبایلیش قەدەغە دەبێت بۆ ئەوەی هیچ لایەنێک داوا لە دەنگدەران نەکات وێنەی کاغەزی دەنگدان بگرن.