دەست بە خەرجکردنی مینحەی بەرکەوتووانی چەکی کیمیایی دەکرێتەوە

ئاڤا نیوز

 

دوای دوو ساڵ لە وەستانی، بە فەرمانی سەرۆکوەزیران مەسرور بارزانی مینحەی مانگانەی بەرکەوتووانی چەکی کیمیایی لە هەرێمی کوردستان دەستپێدەکاتەوە و 585 بەرکەوتوو دەگرێتەوە.

 

وێنە گەورەکە: بەرکەوتووی چەکی کیمیایی ئەوانە دەگرێتەوە، کە لە ئەنجامی تاوانی بەکارهێنانی چەکی کیمیایی لەلایەن ڕژێمی بەعسەوە لە کوردستان زیانی جەستەییان بەرکەوتبێت و کاریگەرییەکەی تاوەکو ئێستا بەردەوام بێت.

 

نووسراوی فەرمی: لە نووسراوێکی دیوانی ئەنجوومەنی وەزیرانی هەرێمی کوردستان کە واژۆی د.ئومێد سەباح، سەرۆکی دیوانی لەسەرە، ئاماژە بە ڕێنمایی ژمارە سێی ساڵی 2021ـی پەیوەست بە ڕێنمایی دیاریکردنی مافی بەرکەوتووی چەکی کیمیایی کراوە، بەپێی ڕێنماییەکە ئەو کەسانەی بە ڕێژەی 40% لە پشکنینی پزیشکی دەرچوون، (ئەوانەی مووچەیان هەیە و ئەوانەی مووچەیان نییە) مینحەی مانگانەیان بۆ خەرج دەکرێت.

 

ئەوەی پێویستە بیزانیت: بەگوێرەی ڕێنمایی ژمارەی سێی ساڵی 2021ی پەیوەست بە ڕێنمایی دیاریکردنی مافی بەرکەوتووی چەکی کیمیایی، خەرجکردنی مینحەیان بەمشێوەیە دەبێت:-

یەکەم: بەرکەوتووی چەکی کیمیایی کە ڕێژەی بەرکەوتەییەکەی لە 40% بۆ 60% بێت، مینحەیەکی مانگانەی بە بڕی 250 هەزار دیناری بۆ دیاری دەکرێت.

دووەم: بەرکەوتووی چەکی کیمیایی کە ڕێژەی بەرکەوتەییەکەی لە 60% زیاتر بێت، مینحەیەکی مانگانەی بە بڕی 400 هەزار دینار بۆ دیاری دەکرێت.