پلانی کوشتنی حەسەن نەسروڵڵا ئاشكرا دەکرێت

ئاڤا نیوز

 

ڕۆژنامەی نیۆیۆرک تایمزی ئەمریکی لەزاری  چەند بەرپرسێکی باڵای  ئیسرائیلەوە زانیاریی ورد لەبارەی  ئۆپەراسیۆنی کوشتنی حەسەن نەسروڵڵا، ئەمینداری گشتیی حیزبوڵڵا بڵاودەکاتەوە.

 

چیرۆکی سەرەکی: بەگوتەی دوو بەرپرسی ئیسرائیل کە قسەیان بۆ ڕۆژنامەی نیویۆرک تایمز کردووە، سەرکردەکانی ئیسرائیل چەند مانگێک بوو ئاگاداری شوێنی حەسەن نەسروڵڵا بوون و پلانی کوشتنی هەفتەی ڕابردوو بڕیاری لێدراوە، چونکە پێیانوابوو دەرفەتێکی کورتیان لەبەردەمدایە بۆ بەئامانجگرتنی.

 

زانیاریی بەدەستهاتوو: بەگوێرەی بەرپرسانی ئیسرائیل، لە ماوەی چەند خولەکێکدا زیاتر لە 80 بۆمب ئاراستەی ئەو شوێنە کراون کە سەرکردەکانی حیزبوڵڵا لێی کۆبوونەتەوە، بەڵام هیچ زانیارییەکیان دەربارەی بۆمبەکان ئاشکرا نەکردووە.

 

لەلایەکی دیکەوە: چەند سەرچاوەیەکی دیکە وێنە و زانیارییان لەبارەی بۆمبەکە ئاشكراکردووە؛ کێشی نزیکەی دوو تۆن دەبێت، پێشکەوتووترین بۆمبە بۆ تەقاندنەوەی ژێرزەمینەکان، دەتوانێت بە قووڵایی 30 مەتر زەوی و 6 مەتر کۆنکرێت ببڕێت.

 

زانیاریی زیاتر: سەرلەبەیانی ئەمڕۆ شەممە، بەگوێرەی ئەو بەرپرسانە بە ئاماژەدان بە زانیارییە هەواڵگرییەکانی ناو لوبنان، حیزبوڵڵا تەرمەکەی نەسروڵڵایان دۆزیوەتەوە و لە کوژرانی دڵنیابوونەتەوە، هاوکات لەو شوێنەی ئیسرائیل بۆردوومانی کرد، تەرمی فەرماندەیەکی باڵای سەربازیی حزبوڵڵا بە ناوی عەلی کەرەکی دۆزراوەتەوە.

 

ئەوەی پێویستە بیزانیت: هاشم سەفیەدین، ئامۆزای حەسەن نەسروڵڵا  و کەسایەتی دیار و سەرەکی لە کاری سیاسی و کۆمەڵایەتی حیزبوڵڵا، بە شوێنگرەوەی نەسروڵڵا دادەنرێت، ڕەنگە بەمزووانە وەک ئەمینداری گشتی نوێی حزبوڵڵا ڕابگەیێنرێت.