قائانی هێرشی گرووپە چەکدارەکانی بۆ سەر ئەمریكا ڕاگرت

ئاڤا نیوز

 

دوای ئەوەی ئەمریكا ڕایگەیاند، زیاتر لە 10 ڕۆژە لە عێراق و سووریا هیچ هێرشێک نەكراوەتە سەر بنكە و بارەگاكانمان، سەرچاوەکان ئاماژە بەوە دەدەن کە فەرماندەی فەیلەقی سوپای قودسی پاسداران، هۆكاری ڕاگرتنی هێرشەكان بووە.

 

وێنە گەورەكە: لە سەرەتای دەستپێكردنی شەڕی غەززە، بارەگاكانی ئەمریكا لە عێراق و سووریا کەوتنە بەر هێرشی گرووپە چەکدارەکانی ئێران، لەبەرامبەردا ئەمریکا وەڵامی هێرشەکانی داوەتەوە، بەڵام لە 04-02-2024 هیچ هێرشێک نەکراوەتە سەر هێزەکانی ئەمریکا لە عێراق و سووریا. 

 

ئەوەی لەبارەیەوە دەگوترێت: ئاژانسی ڕۆیتەرز، ڕاپۆرتێکی لەبارەی ڕاگرتنی ئەو هێرشانە کردووە، پشتبەست بەگوتەی سەرچاوەیەکی ئاگادار، قائانی داوای لە گرووپە چەكدارەكان كردووە هێرشەكانیان بۆ سەر بنكەكانی ئەمریكا ڕابگرن، بەڵام هۆكارەكەی ڕوون نەكردووەتەوە.

 

زانیاریی زیاتر: قائانی لە شەوی 29ـی مانگی ڕابردوو بە سەردانێکی بەپەلە هاتووەتە بەغدا، بەڵام لە فڕۆکەخانەی نێودەوڵەتیی بەغدا دەرنەچووە، لە ترسی سەلامەتی خۆی دوای سەردانەکەی بەخێرایی فڕۆکەخانەی جێهێشتووە. 

 

ئەوەی پێویستە بیزانیت: ئیسماعیل قائانی، فەرماندەی فەیلەقی سوپای قودسی پاسداران، لەگەڵ سەركردەكانی گرووپە چەكدارەكان لە عێراق كۆبووەتەوە، بە گرووپەكانی گوتووە، بەهیچ شێوەیەک چالاكی مەكەن دژی بنكەكانی ئەمریكا تاوەکو كاتێكی دیاریكراو.

 

لێکەوتەکانی: لە 04ـی ئەم مانگەوە هیچ هێرشێک نەکراوەتە سەر هێزەکانی ئەمریکا لە عێراق و سووریا، لەکاتێکدا دووهەفتە پێش سەردانەکەی قائانی 20 هێرش کرابوو.