لە سلێمانی ئەمساڵ دابەشکردنی زەویی فەرمانبەران تەواو نابێت

ئاڤا نیوز 

 

لە سلێمانی بەهۆی نەبوونی کارمەند و بوجە دابەشکردنی زەویی فەرمانبەران کێشەی تێدەکەوێت و ئەمساڵ تەواو نابێت. 

 

وێنە گەورەکە: زیاتر لە 200 هەزار فەرمانبەر و خانەنشین لە وەرگرتنی زەوی سوودمەند دەبن و هەر کەسێک لە سنووری شوێنی کارکردنی 200 مەتر زەوی پێدەدرێت، تاوەکو ئێستا زیاتر لە 50٪یان فۆرمیان پڕکردووەتەوە، بەشێک لە وەزارەت و دەستەکانیش فۆرمەکانیان بۆ وەزارەتی شارەوانی ناردوون و هەفتەی داهاتوو دەست بە وردبینی دەکرێت.

 

لێدوانی فەرمی: زەردەشت ڕەفیق، گوتەبێژی شارەوانی سلێمانی، بە ئاڤا نیوزی گوت: تا کۆتایی ئەمساڵ دابەشکردنی زەوی تەواو نابێت، چونکە هێشتا ڕێککارە یاساییەکان تەواو نەبوون و حکومەتی هەرێمی کوردستانیش لەم پرۆسەیەدا هاوکارمانە.

 

زانیاریی زیاتر: لیژنەیەک بۆ تەواوکردنی ڕێککارە یاساییەکان و گواستنەوەی موڵکداری زەوییەکان بۆ سەر شارەوانی سلێمانی و قەرەبووکردنەوەی هاووڵاتیان پێکهێنراوە.

 

ئەوەی پێویستە بیزانیت: شارەوانی سلێمانی بۆ تەواوکردنی پرۆسەکە داوای بودجە و کارمەندی لە وەزارەتی شارەوانی کردووە.

 

باکگراوند: لە پارێزگای سلێمانی 17 هەزار دۆنم زەوی لە ناوچەکانی تانجەرۆ، تاسڵوجە، سۆتکە تەرخان کراوە، تاوەکو بەسەر فەرمانبەراندا دابەش بکرێت.