سەرۆکی فەرەنسا ئیسرائیل بە هەڵگیرسانی جەنگ تۆمەتبار دەکات

ئاڤا نیوز

دوای هێرشەکانی هەفتەی ڕابردووی ئیسرائیل بۆ سەر حزبوڵڵای لوبنان، ئیمانوێل ماکرۆن، سەرۆکی فەرەنسا، ناتانیاهۆ بە ورووژاندنی شەڕ لە ناوچەکەدا تۆمەتبار دەکات.

وێنە گەورەکە: لە دوای هێرشە ئەلیکترۆنییەکانی ئیسرائیل بۆسەر حزبوڵڵای لوبنان، سەرۆکی فەڕەنسا بەبێ ئەوەی ئاماژە بە حزبوڵڵای لوبنان بکات، پەیامێکی ڤیدیۆیی هاوسۆزی بۆ گەلی لوبنان لە کەناڵی ئێکس بڵاوکردەوە، هاوکات پەیوەندییەکی تەلەفۆنی لەگەڵ سەرۆکوەزیرانی ئیسرائیل ئەنجامدا.

 

ڕاگەیێنراوی فەرمی: کەناڵی12ـی ئیسرائیلی ڕایگەیاند: سەرۆکی فەڕەنسا لە پەیوەندییە تەلەفۆنییەکەدا بە سەرۆکوەزیرانی ئیسرائیلی ڕاگەیاندووە کە بەرپرسیاریت لە ڕێگریکردنی گرژییەکان، ڕێگای دیبلۆماسی ئاسانە و دەبێت بە بەرپرسیارێتییەوە مامەڵە بکەیت، چالاکی ئێوە لە باکوور ناوچەکە بەرەو جەنگ دەبات.

 

زانیاریی زیاتر: سەرۆکوەزیرانی ئیسرائیل داوای لە سەرۆکی فەڕەنسا کرد، لەبری گوشار خستنە سەر ئیسرائیل کاتی ئەوە هاتووە فشار بخاتە سەر حزبوڵڵای لوبنان، چونکە ئیسرائیل تەنیا دەیەوێت هاووڵاتیانی خۆی بە سەلامەتی بهێنێتەوە ماڵەکانیان.

 

باکگراوند: بڵاوکردنەوەی پەیامەکەی ماکرۆن هاوکاتە لەگەڵ کۆبوونەوەی نوێنەرانی دیپلۆماتکارانی فەرەنسا، ئەمریکا، ئیتاڵیا، بەریتانیا و ئەڵمانیا کە لە پاریس سەبارەت بە بارودۆخی ئێستای ڕۆژهەڵاتی ناوەڕاست بەڕێوەچوو، تێیدا بارودۆخی ئێستای لوبنانیش تاوتوێ کرا.