ئەرمەنستان و ئازەربایجان ئاشت دەبنەوە

ئاڤا نیوز

پاش ئەوەی هەفتەی ڕابردوو بەهۆی تەقەی سەر سنووری ئەرمەنستان و ئازەربایجانەوە گرژییەكانی هەردوولا زیاتر هەڵكشان، ئەمڕۆ سەركردەكانیان لە میونشن ڕێككەوتن.

چیرۆكی سەرەكیی: نیكۆل پاشنیان، سەرۆكوەزیرانی ئەرمەنستان و ئیلهام عەلیێڤ، سەرۆكی ئازەربایجان لەگەڵ ئۆلاف شۆلتزی ڕاوێژكاری ئەڵمانیا لە میونشن كۆ بوونەوە، هەردوولا بەڵێنیان دا ناكۆكییەكانیان بە ئاشتی چارەسەر بكەن.

ئەوەی پێویستە بیزانیت: دوای گرژییەكانی هەفتەی ڕابردووی سەر سنووری هەردوولا، پاشنیان هەڕەشەی شەڕی تەواوەتیی دەكرد، بەڵام ئەمڕۆ لێدوانەكانی ساردتر بوونەتەوە.

سەرۆكایەتیی ئازەربایجانیش ئەم دانوستان و ئاشتییەی دووپات كردەوە و وەزارەتی دەرەوەی هەردوولا ڕاسپێرران كۆبوونەوەی دوولایەنە ڕێك بخەن.

لێدوانی فەرمیی: نووسینگەی ڕاوێژكاری ئەڵمانیا ڕایگەیاند: ئەمڕۆ ڕاوێژكار ستایشی بەڵێنی هەردوولای كرد بۆ چارەسەركردنی ڕاجیایی و پرسیارەكانیان بە ڕێگەی ئاشتییانە و بێ بەكارهێنانی هێز.

باكگراوند: سێشەممەی ڕابردوو هەردوو لا یەكتریان بە تەقەكردن لەسەر سنوور تۆمەتبار كرد. یەریڤان ڕایگەیاند سوپای ئازەربایجان چوار سەربازی ئەرمەنستانی كوشتووە. باكۆش گوتی لە وەڵامی ورووژاندنێكی سەربازیی دووشەممەدا بووە كە سەربازێكی ئازەرییان بریندار كردووە.