حیزبوڵڵای لوبنان بۆ ئاڤا: ئیسرائیل لەپشت هێرشە ئەلیکترۆنییەکەیە و وەڵاممان دەبێت

ئاڤا نیوز

 

حیزبوڵڵای لوبنان پشتڕاستی دەکاتەوە، ئیسرائیل لەپشت تەقینەوەی ئامێرەکانی پەیوەندی بووە کە ئەمڕۆ لە بەیرووت سەدان قوربانی لێکەوتەوە، ئاماژە بۆ ئەوەش دەکات ئەو هێرشەی ئیسرائیل بێ وەڵام نابێت.

 

چیرۆکی سەرەکی: کاتژمێر 03:30 خولەکی دوانیوەڕۆی ئەمڕۆ سێشەممە هێرشێکی ئەلیکترۆنی کرایە سەر ئامێرەکانی پەیوەندیکردنی ئەندامانی حیزبوڵڵای لوبنان، لەڕێگەی هاککردنەوە لەیەک کاتدا بێتەلەکان تەقێنرانەوە و بەهۆیەوە 11 کەس کوژران و زیاتر لە چوار هەزار کەسیش بریندار بوون".

 

لێدوانی فەرمی: بەرپرسێک لە نووسینگەی ڕاگەیاندنی حیزبوڵڵای لوبنان بە ئاڤا نیوزی ڕاگەیاند: "ئێمە گومانمان لەوە نییە کە ئیسرائیل لەپشت تەقینەوەی ئامێرەکانی پەیوەندییەوە بووە، ئێمە بەتەواوەتی لەوە دڵنیاین".

 

ئاماژەی بۆ ئەوەش کرد لەبەرامبەر ئەو هێرشە بێدەنگ نابن و وەڵامیان دەبێت. گوتیشی: "سیناریۆکانی وەڵامدانەوەی ئەو ڕووداوە لای مقاوەمە دەبێت و بەدڵنیاییەوە وەڵام دەدرێتەوە".

 

ئەوەی پێویستە بیزانیت: پێشتر حیزبوڵڵای لوبنان لە ڕاگەیێنراوێکدا لەبارەی تەقینەوەی ئامێرە بێتەلەکانی دەست ئەندامەکانی ئەوەی ڕاگەیاندبوو "تاوەکو ئێستا هۆکاری تەقینەوەکان لای ئەوان شاراوەیە و سەرقاڵی لێکۆڵینەوەن".