لە هەولێر بەشێک لە پڕۆژەکانی نیشتەجێبوون نرخی خزمەتگوزاری زیاد دەکەن

ئاڤا نیوز

 

ژمارەیەک پڕۆژەی نیشتەجێبوون لە سنووری شاری هەولێر، نرخی خزمەتگوزارییەكان لەدەرەوەی ڕێنماییەكان زیاد دەكەن و ئاڤا نیوز بەدواداچوونی بۆ دەكات.

 

وێنە گەورەكە: لە پڕۆژەكانی نیشتەجێبوون لە هەرێمی كوردستان، بەپێی كواڵیتی بڕە پارەیەک بەرامبەر خزمەتگوزارییەكان لە نیشتەجێبووان وەردەگیرێت، بەڵام بەشێكیان پابەندی ئەو نرخانە نین كە لەلایەن دەزگا پەیوەندیدارەكانەوە بۆیان دیاریكراوە.

 

زانیاریی بەدەستهاتوو: بەپێی بەدواداچوونی ئاڤا نیوز، بەشێک لە پڕۆژەكانی نیشتەجێبوون لە شاری هەولێر، بێ هۆكار و پێچەوانەی ڕێنماییەكان نرخی خزمەتگوزارییەكانیان بەرزكردووەتەوە، ئەمەش ناڕەزایەتیی دانیشتووانی ئەو پڕۆژانەی لێكەوتووەتەوە.

 

زانیاریی زیاتر: ساڵی 2020 پارێزگای هەولێر بڕیاری كەمكردنەوەی نرخی خزمەتگوزاریی  پڕۆژەكانی نیشتەجێبوونی دا، بەشێوەیەک زۆرینەی نرخەكان بۆ نیوە كەمكرانەوە، بەڵام دوای تێپەڕبوونی چوار ساڵ هێشتا ژمارەیەک لە پڕۆژەكان پابەندی بڕیارەكە نەبوون، هاوكات لەم ڕۆژانە بەشێكیان نرخەكانیان زیاتر بەرزكردووەتەوە.

 

لێدوانی فەرمی: دوای بەدواداچوونی ئاڤا نیوز و ئاشكراكردنی بابەتەكە، د.محەممەد شوكری، سەرۆكی دەستەی وەبەرهێنان ڕایگەیاند: لەڕێگەی لیژنەكانمانەوە دەستمان بە بەدواداچوون كردووە و بەدڵنیاییەوە ڕێوشوێنی پێویست بەرامبەر سەرپێچیكاران دەگیرێتەبەر.

 

ئەوەی پێویستە بیزانیت: ئەگەر نموونەی یەكێک لە پڕۆژە سەرپێچیكارەكان وەربگرین، دەردەكەوێت بەپێی ڕێنماییەكانی پارێزگای هەولێر دەبێت بۆ خزمەتگوزاری یەكەیەی 340 مەتری بڕی 95 هەزار وەربگیرێت، لەكاتێكدا پێشووتر نرخەكە 186 هەزار دینار بوو، بەڵام ئێستا لە هەمان پڕۆژە بۆ یەكەیەكی یەك ژووی 135 هەزار وەردەگیرێت.