عێراق و ئێران جەختیان لە کاراکردنی ڕێککەوتنەکانی نێوانیان کردەوە

ئاڤا نیوز

 

سەرۆککۆماری عێراق لە کۆشکی بەغدا پێشوازیی لە سەرۆککۆماری ئێران و شاندی یاوەری کرد و لە کۆبوونەوەیەکدا هەردوولا جەختیان لە کاراکردنی ڕێککەوتنەکانی نێوانیان کردەوە. 

 

وێنە گەورەکە: لە یەکەمین گەشتی بۆ دەرەوەی وڵات، لە دوای دەستبەکاربوونی وەک سەرۆککۆماری ئێران، مەسعود پزیشکیان بەیانیی ڕۆژی چوارشەممە 11-09-2024 گەیشتە بەغدا و لەلایەن سەرۆکوەزیرانی عێراقەوە پێشوازیی لێکرا، دواتر لەلایەن د.عەبدوللـەتیف ڕەشید، سەرۆککۆماری عێراق لە کۆشکی بەغدا پێشوازیی لێکرا و کۆبوونەوە.

 

ڕاگەیێنراوی فەرمی: نووسینگەی سەرۆککۆماری عێراق ڕایگەیاند: لە میانی دیدارەکەدا د.عەبدوللـەتیف ڕەشید جەختی لەسەر ئەوە کردەوە "پەیوەندییەکانی نێوان هەردوو وڵاتی دۆست پتە و مێژووییە، ئێران دراوسێیەکی گرنگی عێراقە و پێگەیەکی گەورەی ناوچەیی هەیە لە پاڵپشتیکردن و سەقامگیرکردنی ناوچەکە.

 

زانیاریی زیاتر: جەخت لە کاراکردنی بڕگەکانی ڕێککەوتننامە و یاداشتەکانی لێکتێگەیشتن کە لە نێوان هەردوو وڵاتدا واژۆ کراون، کرایەوە. هاوکات پتەوکردنی پەیوەندییەکانیان بە شێوەیەک کە خزمەت بە بەرژەوەندییە هاوبەشەکانی نێوان دوو وڵات بکات.

 

لەلایەکی دیکەوە: پزیشکیان پەرۆشی خۆی بۆ بەهێزکردنی پەیوەندییەکانیان لەگەڵ عێراق لە بوارە جیاوازەکاندا دووپات کردەوە، هاوکات خواستی ئێرانی بۆ پێکهێنانی لیژنەیەکی هاوبەش لە نێوان هەردوو وڵاتی دراوسێ بە هەرێمی کوردستانیشەوە دەربڕی بۆ داڕشتنی بەرنامەیەکی ستراتیژی بۆ هاوکاری هاوبەش  لە کەرتەکانی تەندروستی، ژینگە، پیشەسازی، ئاسایش و گەشتیاری.