چیرۆکی ونبوونی نارین هەموو تورکیا بەخۆیەوە سەرقاڵ دەکات

ئاڤا نیوز

 

 

نارین گورەن، ئەو کچە تەمەن هەشت ساڵەی لە 21ـی ئابەوە لە پارێزگای ئامەدی باکووری کوردستان وون بوو، دوای 19 ڕۆژ گەڕانی بەردەوام، ئەمڕۆ تەرمەکەی لە ناو گۆمێکی ئاودا دۆزرایەوە.

 

چیرۆکی سەرەکی: نارین گورەن، تەمەنی 8 ساڵ، دانیشتووی گوندی تاوشان تەپە لە پارێزگای ئامەدی باکووری کوردستانە، دوای ئەوەی دەچێتە خوولی قورئان خوێندن، ناگەڕێتەوە ماڵەوە، ماوەی 19 ڕۆژە خەڵکی تورکیا بە هیواوە چاودێری هەواڵی چارەنووسی ئەو منداڵە دەکەن، ئەمڕۆ لە ناو گۆمێکی ئاو کە کیلۆمەترێک و نیو لە ماڵی خۆیانەوە دوورە، تەرمەکەی دۆزرایەوە.

 

لێدوانە فەرمییەکان: عەلی یەرلیکایە، وەزیری ناوخۆی تورکیا ڕایگەیاند، بەرەبەیانی ئەمڕۆ تەرمی نارین لەلایەن هێزی جەندرمەی تورکی دۆزرایەوە، تەرمەکە بۆ پزیشکی داد گواستراوەتەوە.

 

لەلایەکی دیکەوە: یڵماز تونج، وەزیری دادی تورکیا دڵنیایی دەدات لە دۆزینەوەی تاوانباران و سزادانیان.

 

کاردانەوەکان: هەواڵی کوژرانی نارین کارادانەوەیەکی گەورەی لە میدیاکانی تورکیا دروست کردووە، بەجۆرێک ڕەجەب تەیب ئەردۆغان، سەرۆککۆماری تورکیای هێنایە سەرخەت ،خەڵکیش داوای بە سزا گەیاندنی تۆمەتبارانی تاوانەکە دەکەن.

 

زانیاریی زیاتر:  بەپێی لێکۆڵینەوە سەرەتاییەکان نارین دوای ئەوەی بریندار کراوە خراوەتە ناو گۆمێکی ئاوەوە تاوەکو گیانی سپاردووە، مامی نارین کە لەهەمان کاتدا موختاری گوندەکەیانە، وەک تۆمەتباری سەرەکی ڕووداوەکە دەستگیرکراوە.