باجی هاوردەکردنی ئۆتۆمبێلی کارەبایی 100% هەڵگیرا

ئاڤا نیوز 

 

گوتەبێژی وەزارەتی گواستنەوە و گەیاندنی هەرێمی کوردستان ڕایگەیاند، ڕەزامەندی وەزارەتی دارایی و ئابووریی هەرێمی کوردستانیان وەرگرتووە لەسەر لێخۆشبوون لە 100%ـی باجی سەر هاوردەکردنی ئۆتۆمبێلی کارەبایی بۆ هەرێمی کوردستان.

 

لێدوانی فەرمی: دیلان ڕەشاد، گوتەبێژی وەزارەتی گواستنەوە و گەیاندنی هەرێمی کوردستان تایبەت بە ئاڤا نیوزی ڕایگەیاند: دوای هەوڵ و ماندوبوونێکی زۆر وەکو وەزارەتی گواستنەوە و گەیاندن دوای ئەوەی نووسراومان بۆ وەزارەتی دارایی و ئابووری کرد بۆ وەرگرتنی ڕەزامەندی لەسەر هەڵگرتنی باجی ئۆتۆمبێلی کارەبایی لە 100% بۆ ئەو ئۆتۆمبێلە کارەباییانەی هاوردەی هەرێمی کوردستان دەکرێن، دواجار وەزارەتی دارایی ڕەزامەندی پیشاندا بۆ ئەوەی 100% باجی گومرگیان لەسەر هەڵبگیرێت.

 

زانیاریی زیاتر: بەگوتەی دیلان ڕەشاد، ئەو هەنگاوەی وەزارەتەکەیان "بە مەبەستی پاراستنی ژینگەی هەرێمی کوردستان و هاندانی وەبەرهێنەران و بازرگانان بۆ هاوردەکردنی ئۆتۆمبێلی کارەبایی".

 

ئەوەی پێویستە بیزانیت: ئێستا هەر بازرگانێکی کورد ئۆتۆمبێلی کارەبایی هاوردە بکات 100% باجی لەسەر هەڵگیراوە بەبێ پێدانی باج داخلی هەرێمی کوردستان دەکرێت.