عێراق  کۆمپانیا جیهانییەکان بۆ بەرهەمهێنانی غاز بانگھێشت دەکات

ئاڤا نیوز

بەمەبەستی بەرهەمهێنان لە 10 کێڵگەی غاز و بانگهێشتکردنی کۆمپانیا جیهانییەکان تا بێن و وەبەرهێنان لەو کێڵگانەدا بکەن، بەمزوانە وەزیری نەوتی عێراق سەردانی ئەمریکا دەکات.

ئەوەی پێویستە بیزانیت: لەکۆی 29 کێڵگەی عێراق کە ئەمساڵ لە گەڕی مۆڵەتپێدانی پێنجەم و شەشەم خراونەتەڕوو بۆ ئەوەی وەبەرهێنانیان تێدا بکرێت، تائێستا 14 کێڵگە گرێبەستیان بۆ کراوە و کاریان تێدا دەکرێت، 10 کێڵگەی غازیش تائێستا یەکلایی نەکراونەتەوە.

لێدوانی فەرمی: حەیان عەبدولغەنی، وەزیری نەوتی عێراق بە ئاژانسی هەواڵی عێراقی ڕاگەیاندووە، وەزارەتەکەی دەیەوێت ئەو دەرفەتە بخاتە بەردەم کۆمپانیا تایبەتمەندەکانی جیهان، بۆ ئەو مەبەستەش بەمزووانە سەردانی ئەمریکا دەکات و وەبەرهێنانی ئەو کێڵگانە دەخاتە بەردەم کۆمپانیا ئەمریکییەکان کە لە ئاستی جیهان لەم بوارەدا کاردەکەن.

ژمارەکان وادەڵێن: یەکێک لەو کێڵگانەی وەزارەتی نەوت دەیەوێت وەبەرهێنانی غازی تێدا بکات کێڵگەی عەنزە لە پارێزگای ئەنبار کە توانای بەرهەمهێنانی هەزار ملیۆن پێ سێجا غازی هەیە، یەکێکی دیکەش لە کێڵگەکان دەکەوێتە پارێزگای بەسرە و توانای بەرهەمهێنانی دەگاتە 125 ملیۆن پێ سێجا غاز.