شاخەوان عەبدوڵڵا: دەبێت ڕێککەوتنی یەکێتی لە کەرکووک بە یاسا ڕێکبخرێت

ئاڤا نیوز

 

جێگری سەرۆکی پەرلەمانی عێراق ئاماژە بەوە دەکات، لە کۆبوونەوەی 4ـی ئاب لایەنە عەرەبییەکان ڕازی بوون بەوەی پۆستی پارێزگار بۆ کورد بێت، بەو مەرجەی 50%ـی پۆستەکانی ئیدارەکەیان پێبدرێت، بەڵام سەرۆک بارزانی ڕازی نەبوو، ئێستا لەبەرامبەر پۆستی پارێزگاری کەرکووک 70%ـی پۆستەکانی ئیدارەکەیان پێدراوە.

 

وێنە گەورەکە: ڕۆژی یەكشەممە 04-08-2024 لە پارێزگای سەڵاحەددین سەرۆک بارزانی لەگەڵ شاندێكی هاوبەشی كوتلەی عەرەبی و توركمانی ئەنجوومەنی پارێزگای كەركووک کۆبووەوە، پێداگری لەسەر ئەوە کردەوە کە پۆستی پارێزگار بۆ کورد بێت و شێوازی دابەشکردنی پۆستەکان 32% بە 32% بێت ئەوان ڕازی بوون، بەڵام داوای 50%ـی پۆستەکانی ئیدارەکەیان کردووە.

 

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق ڕایگەیاند، "مافی لایەنێک نییە بە تەنیا پۆست دابەش بکات، دەبێت ئەو ڕێكکەوتنەی کراوە بە یاسا ڕێک بخرێت، چونکە دوای ساڵێک و چوار مانگ پۆستی پارێزگار لە کورد وەردەگیرێتەوە ڕوون نییە ئەوکات ئەو پۆستانەی ئێستا دراون بە لایەنەکانی دیکە چیان بەسەر دێت".

 

زانیاریی زیاتر: جێگری سەرۆکی پەرلەمانی عێراق لە بەشێکی دیکەی ئاخاوتنەکانیدا تیشکی خستەسەر ئەوەی، کە تاوەکو ئێستا یەکێتی ڕوونکردنەوەی لەبارەی شێوازی پۆستەکان نەخستووەتەڕوو، ئەوەی لە لایەنەکانی دیکەی نێو ڕێککەوتنەکە نێردراوە 70%ـی پۆستەکانی حکومەتی خۆجێی کەرکوکیان پێدراوە.