میسر مۆڵەتی 36 کۆمپانیای گەشتیاریی هەڵدەوەشێنێتەوە

ئاڤا نیوز

 

وەزارەتی گەشتوگوزار و ئاسەواری میسر بە پشتبەستن بە ڕاسپاردەکانی شانەی قەیرانی حەج, مۆڵەتی 36 کۆمپانیای گەشتیاریی هەڵوەشاندەوە.

 

وێنە گەورەكە: بەهۆی ئەوەی ژمارەیەكی زۆر حاجی لە پڕۆسەی حەجی ساڵی 2024 دا گیانیان لەدەستدا، بەشێكی زۆر لەو حاجیانە میسری بوون، وەزارەتی گەشتوگوزاری میسر لە لێکۆڵینەوەکانی بەردەوامە لەو كۆمپانیا گەشتیاریانەی كاری حەج و عومرە دەكەن.

 

ڕاگەیەنراوی فەرمی: وەزارەتی گەشتوگوزار و ئاسەواری میسر ڕایگەیاند:” مۆڵەتی 36 کۆمپانیای گەشتیارییان هەڵوەشاندەوە, ئەمەش دوای ئەوەی سەلمێنراوە بڕگە یاساییەکانی ڕێکخستنی گەشتەکانی حەج و عومرەیان  پێشێلكردووە.

 

ئەوەی پێویستە بیزانیت: لە پڕۆسەی حەجی ئەمساڵدا هەزار و 301 حاجی گیانیان لەدەستدا و لەو ژمارەیەش 500 یان میسری بوون.

 

ئەمەش بزانە: دەستەیەكی باڵا لە وەزارەتی گەشتوگوزار و ئاسەواری میسر، لێكۆڵینەوە لە ژمارەیەک كۆمپانیای دیكە دەکات و ئەگەری هەیە بەشێكی دیكەی لەو کۆمپانیایانە دابخات و مۆڵەتەكەیان لێوەربگرێتەوە.

 

زانیاریی زیاتر: لە سەرتاسەری میسر، نزیكەی دوو هەزار و 500 كۆمپانیای گەشتیاریی هەیە.