ئاگرەکەی هەولێر 62 کەسی دووچاری هەناسە تەنگی کرد

ئاڤا نیوز

شەوی ڕابردوو ئاگرێکی گەورە لە باڵەخانەیەکی سێ نهۆمی شەقامی 60 مەتری هەولێر کەوتەوە، بەهۆیەوە زیانێکی زۆر بەر چەند کۆگایەکی کەلوپەلی جوانکاری ئۆتۆمبێل کەوت و زانیارییە تەندروستییەکان دەڵێن، 62 کەس دووچاری هەناسە تەنگی هاتوون.

وێنە گەورەکە: لە هەرێمی کوردستان هەر ڕووداوێکی ئاگرکەوتنەوە ڕوودەدات، تیمەکانی تەندروستی لەپاڵ تیمەکانی ئاگرکوژێنەوەو ئاسایش چارەسەری ئەوانە دەکەن بەهۆی ئاگرەکەوە دووچاری گرفتی تەندروستی دەبن.

لێدوانی فەرمی: د.ڕێزان ئەنوەر گەردی، بەڕێوەبەری کردە پزیشکییەکان لە بەڕێوەبەرایەتی گشتی تەندروستی هەولێر بە ئاڤا نیوزی ڕاگەیاند: دوێنێ شەو دوای کەوتنەوەی ئاگرەکە، چەند تیمێکی تەندروستی لەشوێنی ڕووداوەکە ئامادەبوون، 62 کەس دووچاری هەناسەتەنگی بوو، لەو ژمارەیە نۆ کەسیان ڕەوانەی نەخۆشخانە کران و 53 کەسی دیکەیان لە هەمان شوێن چارەسەریان بۆ کرا.

لە لایەکی دیکەوە: لەبارەی هۆکارەکانی کەوتنەوەی ئاگرەکە ئومێد خۆشناو، پارێزگاری هەولێر ڕایگەیاند: لیژنەیەکی لێکۆڵینەوە لە ڕووداوەکە پێکهاتووە، بەدواداچوون بۆ هۆکاری کارنەکردنی سیستەمی ئاگرکوژێنەوەی بازاڕەکە دەکەن.

باکگراوند:کاتژمێر 11ی دوێنێ شەو، ئاگر لە کۆگایەکی کەلوپەلی جوانکاری ئۆتۆمبێل لە شەقامی 60 مەتری نزیک گەڕەکی سێتاقان کەوتەوە، بەهۆیەوە چەند کۆگایەک سووتان و زیانێکی زۆر بە کاسبکارانی بازاڕەکە کەوت.