لێدوانی جیاواز لەبارەی چوونی هێزەکەی حەشدی شەعبی بۆ گەرمیان

ئاڤا نیوز 

ژووری ئۆپەراسیۆنەکانی دیالە لەبارەی چوونی هێزەکەی حەشدی شەعبی بۆ کوڵەجۆ لێدوانی جیاواز دەدات و ئاماژە بۆ ئەوە دەکات ئامانجی چوونی هێزەکە بۆ ڕێگریکردن کردن بووە لە بە قاچاغبردنی نەوت لە بیرە نەوتەکانی ناوچەکە.

وێنە گەورەکە: بەرەبەیانی ئەمڕۆ هێزێکی زۆری حەشدی شەعبی هەڵیانكوتایە سەر بیرە نەوتی چاڵاو خالید لە ناحیەی کوڵەجۆی سنووری گەرمیان و دەستیان بەسەردا گرت، چوونی هێزەکەش کاردانەوەی فراوانی لێکەوتەوە. ناحیەی کوڵەجۆ لەڕووی ئیدارییەوە سەر بە پارێگای دیالە.

لێدوانی فەرمی: بەرپرسێکی ئەمنی لە ژووری ئۆپەراسیۆنەکانی دیالە بە ئاڤا نیوزی گوت: "ئەو هێزە ئەمنییەی چوونەتە ناوچەکە پێکهاتوون لە سوپا و حەشدی شەعبی، مەبەستیان ڕێگریکردن بووە لە بە قاچاغبردنی نەوتی بیرە نەوتەکە کە دەکەوێتە دەوروبەری قەرەتەپە لە باکووری ڕۆژئاوای پارێزگای دیالە".

زانیاریی زیاتر:  ئەو ناوچەیەی هێزەکە دەستی بەسەردا گرتووە، ناوچەیەکی بۆشایی ئەمنییە لە نێوان هێزەکانی پێشمەرگە و هێزەکانی حەشدی شەعبی و سوپا، لەکاتی چوونی هێزەکانیش هیچ پێکدادانێک ڕووینەداوە.

ئەوەی پێویستە بیزانیت: بەرپرسێکی حەشدی شەعبی بە هێزەکانی پێشمەرگەی گوتووە ئەوان بە ئاگاداری بافڵ تاڵەبانی هاتوونەتە ناوچەکە بەمەبەستی ئەنجامدانی ئۆپەراسیۆنێکی سەربازیی دژ بە داعش و سێ ڕۆژ دەمێننەوە.

بۆچوونی بەرامبەر: سەعدی پیرە، گوتەبێژی یەکێتی بە ئاڤا نیوزی گوت: چوونی هێزەکەی حەشدی شەعبی بۆ سنووری گەرمیان بەبێ ئاگاداری ئەوان و هێزە فەرمییەکانی ناوچەکە بووە و دەبێت بەزووترین کات بکشێنەوە و بۆ ئەم مەبەستەش قسە لەگەڵ حکومەتی فیدراڵی کراوە.