حەشدی شەعبی لە کوڵەجۆ دەست بەسەر کێڵگەیەکی نەوتدا دەگرێت

کوردستان
25 ئاب

شەیری بکە لە:

ئاڤا نیوز

هێزێکی حەشدی شەعبی چوونەتە سنووری میحوەری یەکی پێشمەرگە لە ناحیەی کوڵەجۆی گەرمیان و دەستیان بەسەر بیرەنەوتەکانی ئەو سنوورەدا گرتووە، بە زەبری هێزیش چەند گوندێکیان بە دانیشتووانەکەی چۆڵ کردووە، هێزەکانی پێشمەرگەش هەوڵ دەدەن ڕێگرییان لێبکەن.

چیرۆکی سەرەکی: کاتژمێر 04:00ی بەیانی ئەمڕۆ یەکشەممە هێزێکی زۆری حەشدی شەعبی چوونەتە ناحیەی کوڵەجۆ و قەرەتەپە و دەستیان بەسەر چەند بیرە نەوتێکدا گرتووە. ناحیەی کوڵەجۆ دەکەوێتە سنووری ماددەی 140 و سەر بە پارێزگای دیالەیە، دەکەوێتە نێوان کفری و کەلار و خانەقین.

لێدوانی فەرمی: کۆچەر ئەکبەر، کارگێڕی لقی 22ی پارتی دیموکراتی کوردستان لە گەرمیان بە ئاڤا نیوزی گوت: هێزەکەی حەشدی شەعبی سەدان چەکدار لەخۆدەگرێت و دەیان ئۆتۆمبێلی سەربازی و شۆفڵیان پێیە، ئێستا سەرقاڵی دروستکردنی سەنگەر و بەهێزکردنی پێگەکانیانن.

لەلایەکی دیکەوە: سەرچاوەیەک لە هێزە ئەمنییەکانی ناوچەکە بە ئاڤا نیوزی گوت: " هێزەکەی حەشدی شەعبی دوو لیوا دەبن و بۆ دەستبەسەرداگرتنی چەند بیرە نەوتێک هاتوونەتە ناوچەکە، سەرەتاش چوونەتە گوندی سەید مدری کە پێشتر لەلایەن پۆلیسی نەوت و گازی گەرمیانەوە دەپارێزرا".

زانیاریی زیاتر: بەگوتەی سەرچاوەکە، هێزەکەی حەشد بە پۆلیسی نەوت و گازیان گوتووە؛ ئەوان بەڕێککەوتن بۆ ماوەی سێ ڕۆژ هاتوونە سنوورەکە و ڕاستەوخۆ قسەیان لەگەڵ بافڵ تاڵەبانی، سەرۆکی یەکێتی کردووە، بەشێکی هێزەکەش بە ئاراستەی کفری ڕۆشتوون، بە گوندەکانی ئەو سنوورەدا بڵاوبوونەتەوە و بە زۆر چەند گوندێکیان بە دانیشتووانەکەی چۆڵ کردووە و هێزەکانیان جێگیر کردووە، هێزەکانی پێشمەرگە ڕێگرییان لێدەکەن.