لە کەرکووک پۆست بۆ پارتی و بەرەی تورکمانی دیاری دەکرێن

ئاڤا  نیوز

لە حکومەتی خۆجێیی کەرکووک ژمارەیەک پۆست بۆ پارتی  و بەرەی تورکمانی دانراون و لەنێویاندا دوو پۆستی باڵا هەن. بڕیارە سەردانی هەردوو لایەنەکە بکرێت و داوایان لێبکرێت پۆستەکان وەربگرن و بەشداریی کۆبوونەوەکانی ئەنجوومەنی پارێزگاش بکەن.

 

چیرۆکی سەرەکی: ئەمڕۆ شەممە ئەنجوومەنی پارێزگای کەرکووک بە بەشداری نۆ ئەندام (پێنج یەکێتی، سێ عەرەب و ئەندامێکی بزووتنەوەی بابیلوون) لەکۆی 16 ئەندام یەکەم کۆبوونەوەی کرد و  45 خولەکی خایاند. دوو ئەندامی پارتی و دوو ئەندامی بەرەی تورکمانی و سێ ئەندامی عەرەب کە لە دەرەوەی ڕێککەوتنی پێکهێنانی حکومەتی خۆجێیی بوون، بەشداریی کۆبوونەوەکەیان نەکرد.

 

لێدوانی فەرمی: پەروین فاتیح، ئەندامی فراکسیۆنی یەکێتی لە ئەنجوومەنی پارێزگای کەرکووک بە ئاڤا نیوزی ڕایگەیاند، "لە کۆبوونەوەکەدا بڕیاردرا سەردانی ئەو فراکسیۆنانە بکەین کە لە حکومەتی خۆجێیی بەشدارنین، بۆ پارتی و بەرەی تورکمانیش پۆستی گرنگ دانراون."

 

زانیاریی تایبەت: ئاڤا نیوز زانیویەتی ژمارەیەک پۆست لەنێویاندا پۆستی جێگری پارێزگار بۆ کاروباری هونەری بۆ پارتی دانراوە، 17 پۆستیش بۆ پێکهاتەی تورکمان دانراون لەنێویاندا پۆستی جێگری سەرۆکی ئەنجوومەنی پارێزگا هەیە.

بۆچوونی لایەنێکی بەرامبەر: کاوە ئەحمەد، کارگێڕی لقی سێی پارتی لە کەرکووک بە ئاڤا نیوزی گوت: حکومەتی خۆجێیی کەرکوومان بایکۆت نەکردووە، دەمانەوێت بەفەرمی ناوەڕۆکی ئەو ڕێککەوتنە بزانین کە کراوە ئینجا بڕیار دەدەین". ناوبراو مەبەستی لە ڕێککەوتنی یەکێتی و سێ ئەندامی عەرەب و ئەندامێکی کۆتای کریستیان بوو بۆ دابەشکردنی پۆستەکان.