لایەنێکی دیکەی کوردستانی لە کەرکووک پۆست وەردەگرێت

ئاڤا نیوز 

 

حیزبی شیوعی وەک بەشێک لە "هاوپەیمانیی کەرکووک هێز و ئیرادەمانە" بەشدار دەبێت لە پێکهێنانی حکومەتی خۆجێیی ئەو پارێزگایە و پۆستی دەبێت.

 

وێنە گەورەکە: نزیکەی 50 پۆستی "گرنگ"ـی کەرکووک لە بەرژەوەندی لایەنەکانی عەرەب و تورکمان یەکلایی بوونەتەوە، ئەو بەشەی کە بۆ پێکهاتەی کورد ماوەتەوە بەرکەوتەی حیزبی شیوعی تێدایە.

 

لێدوانی فەرمی: دڵشاد حەساری، بەرپرسی  مەڵبەندی  حیزبی شیوعی لە کەرکووک بە ئاڤا نیوزی گوت، "لەگەڵ یەكێتیی ڕێککەوتنی سیاسیمان هەیە، داوای پۆستێکی سیادی ئیدارەی کەرکووکمان کردووە، کە خۆی لە یاریدەدەری پارێزگار، بەڕێوەبەری ناحیە یان بەرپرسی فەرمانگە دەبینێتەوە".

 

ئەوەی پێوستە بیزانیت: هاوپەیمانیی کەرکووک هێز و ئیرادەمانە لە هەڵبژاردنی کۆتایی ساڵی ڕابردووی ئەنجوومەنی پارێزگاکانی عێراق 57 هەزار و 82 دەنگی بەدەستهێنا، حیزبی شیوعی یەک بەربژێری لە نێو هاوپەیمانەتییەکە هەبوو و دوو هەزار و 34 دەنگی بەدەستهێنا.