نێچیرڤان بارزانی: هه‌موو ڕێكارەکان ده‌گرینه‌به‌ر بۆ هەڵبژاردن

ئاڤا نیوز
 
نێچیرڤان بارزانی، سەرۆکی هەرێمی کوردستان لەگەڵ سه‌رۆك، جێگران و ئه‌ندامانی دادگەی پێداچوونه‌وه‌ی هه‌رێمی كوردستان كۆبووەوە‌ بۆ تاووتوێکردنی بەڕێوەچوونی هەڵبژاردنی پەرلەمانی کوردستان.
 
بۆچی گرنگە: وادەی هەڵبژاردنی پەرلەمانی کوردستان دواکەتووە و تا ئێستا سێ جار کاتی بەڕێوەچوونی گۆڕاوە. دواهەمین وادە 25-02-2024 بوو، بەڵام کۆمسیۆنی باڵای هەڵبژاردنەکانی عێراق ڕایگەیاند، لەو وادەیە ناتوانرێت هەڵبژاردن بکرێت. چاوەڕێ دەکرێت سەرۆکایەتی هەرێم وادەیەکی نوێ دیاری بکات.
 
ئەوەی پێویستە بیزانیت: له‌ كۆبوونه‌وه‌كه‌دا كە وەزیری دادی حكوومەتی هەرێمی كوردستان ئامادەی بوو، پرسی دواكه‌وتنی بڕیاری دادگەی باڵای فیدڕاڵی عێراق سه‌باره‌ت به‌ یاسای هه‌ڵبژاردنی په‌رله‌مانی كوردستان و ڕه‌هه‌نده‌ ده‌ستووری و یاساییه‌كان و ئەگەر و لێكەوتەكانی، خرانە بەر باس و گفتوگۆ.
 
ڕاگەیێنراوی فەرمی: سه‌رۆكی هه‌رێمی كوردستان جه‌ختی له‌وه‌ كرده‌وه‌ سه‌رۆكایه‌تیی هه‌رێمی كوردستان و لایه‌نه‌ په‌یوه‌ندیداره‌كان هه‌موو ڕێكارێكی ده‌ستووری و یاسایی ده‌گرنه‌به‌ر بۆ بەڕێوەچوونی هه‌ڵبژاردنی په‌رله‌مانی كوردستان.