ئێکس ئۆفیسەکانی لە بەڕازیل دادەخات

ئاڤا نیوز

کۆمپانیای ئێکس بەهۆی کێشەی سانسۆرەوە بڕیاری داخستنی ئۆفیسەکانی لە بەڕازیل دا، دوای ئەوەی لەگەڵ دادگەی باڵای وڵاتەکە کەوتە کێشەوە.

چیرۆکی سەرەکی: دادوەرێک بە ناوی ئەلێکساندەر دی مۆراس لە دادگەی باڵای بەرازیل هەڕەشەی لە تۆڕی کۆمەڵایەتیی ئێکس کرد؛ بەوەی نوێنەری یاسایی کۆمپانیاکە لە بەڕازیل دەستگیر دەکات، ئەگەر کۆمپانیاکە پابەند نەبێت بە فەرمانەکانی، کە دەبێت هەندێ بابەت سانسۆر بکات.

ڕاگەیێنراوی فەرمی: کۆمپانیای ئێکس ڕایگەیاند، ستافی ئێکس لە بەڕازیل هیچ بەرپرسیارێتییەک و کۆنترۆڵێکیان نەبووە لەوەی ئایا ناوەڕۆکەکە سانسۆر دەکرێت یان نا، بەڵام دادوەرەکە بێ ئەوەی ڕێز لە یاسا بگرێت، هەڕەشەی لە ستافی ئێکس کردووە، بۆ پاراستنی سەلامەتی ستافەکەمان بڕیاری داخستنی ئۆفیسەکانمان لە بەڕازیل داوە".

ئەوەی پێویستە بیزانیت: سەرەڕای ئەوەی کۆمپانیای ئێکس ئۆفیسەکانی لە بەڕازیل داخستوون، بەڵام تۆڕە کۆمەڵایەتییەکە کاردەکات و خەڵکی بەڕازیل دەتوانن بەکاریبهێنن.