عێراق لەبارەی داننان بە جینۆسایدی کوردانی ئێزدی سوپاسی چەند وڵاتێک دەکات

ئاڤا نیوز

 

وەزیری دەرەوەی عێراق سوپاسی حکومەت و پەرلەمانی ئەو وڵاتانە دەکات کە هێرشی ڕێکخراوی داعشیان لە سنووری قەزای شنگال بە جینۆساید ناساندووە.

 

وێنە گەورەکە: تاوەکو ئێستا ژمارەیەک وڵات و پەرلەمانی وڵاتان تاوانی دژ بە کوردانی ئێزدییان لەسەر دەستی داعش لە ساڵی 2014 لە قەزای شنگال و دەوروبەری وەک جینۆساید ناساندووە.

 

لێدوانی فەرمی: فوئاد حوسێن لە میانی پێشکەشکردنی گوتارێک لە کۆنفرانسی جینۆسایدی کوردانی ئێزدی کە لە بارەگای وەزارەتی دەرەوە بەڕێوەچوو، ڕایگەیاند: حکومەتی عێراق هاوشانی حکومەتی هەرێمی کوردستان هەوڵەکانی خستووتەگەڕ بۆ گەڕان بەدوای ڕفێنراوەکان و کارەکان بۆ ئەو مەبەستە بەردەوامن.

 

زانیاریی زیاتر: سوپاسی حکومەتی ئەو وڵات و پەرلەمانانە دەکەین کە دانیان بەوەدا ناوە ئێزدییەکان لەسەر دەستی چەتەکانی تیرۆیستی داعش ڕووبەڕووی تاوانی جینۆساید بوونەتەوە. فوئاد حوسێن وا دەڵێت.

 

لەلایەکی دیکە: وەزیری دەرەوەی عێراق ڕایگەیاند: پشتیوانی خۆمان بۆ ئێزدییەکان دووپات دەکەینەوە، هاوکات دووپاتی دەکەینەوە کە وەزارەتی دەرەوە بەردەوام دەبێت لە تیشک خستنەسەر ئەو کۆمەڵکوژییەی ڕووبەڕووی ئێزدییەکان بووەوە، بەڵێنیش دەدەین هەموو کارێکی پێویست بکەین بۆ بەدیهێنانی دادپەروەری و قەرەبووکردنەوە کەسوکاری قوربانیانی دەستی داعش.