مونا قەهوەچی: دادگەی فیدڕاڵی هەر بڕیارێک لەسەر کورسی کۆتاکان بدات قبوڵی دەکەین

ئاڤا نیوز

 

لەدوای دواخستنی دانیشتنەکەی دادگەی فیدڕاڵی لەسەر یاسای هەڵبژاردنی پەرلەمانی کوردستان، پێشبینی دەکرێت لە دانیشتنی داهاتوودا کورسی کۆتای تورکمان و ئەرمەن هەڵبوەشێندرێتەوە، بەشێک لە لایەنە تورکمانییەکان دەڵێن، هەر بڕیارێک بدرێت قبوڵی دەکەن.

بۆچی گرنگە: تا ئێستا دە جار دادگەی فیدڕاڵی دانیشتنی لەبارەی یاسای هەڵبژاردنەکانی پەرلەمانی کوردستان دواخستووە و سێ جاریش وادەی بەڕێوەچوونی هەڵبژاردنی پەرلەمانی کوردستان گۆڕاوە. یەکلاییبوونەوەی ئەم دۆسیەیە کاریگەری لەسەر دیاریکردنی وادەیەک دەبێت بۆ هەڵبژاردن.

لێدوانی فەرمی: "ئامادەسازی تەواومان کردووە بۆ هەڵبژاردنی خولی شەشەمی پەرلەمانی کوردستان، بڕیاری دادگەی فیدڕالی یەکلایکەرەوە دەبێت و تانەی لێنادرێت، خۆمان لەگەڵ هەر بڕیار و یاسایەک دەگونجێنین"، مونا قەهوەچی، جێگری سەرۆکی پارتی چاکسازی تورکمان ئەمەی بە ئاڤا نیوز گوت.

ئه‌وەی پێشبینی دەکرێت: ئاڤا نیوز زانیویەتی ئه‌گه‌ر هه‌یه‌ سكاڵاكه‌ بەم شێوەیە یەكلایی بكرێته‌وه‌:

•    كورسی كۆتای توركمان و ئەرمەن هەڵدەوەشێتەوە، كه‌ ژماره‌یان شه‌ش كورسییه.
•    تەنیا پێنج كورسی كۆتای مەسیحی دەمێنێته‌وه‌.
•    ژمارەی ئەندامانی پەرلەمانی كوردستان له‌ "111 بۆ 105" ئەندام كه‌م دەبێته‌وه‌.
•    هەڵبژاردنی په‌رله‌مانی كوردستان بە سێ بازنە بەڕێوەدەچێت.