نوێترین زانیاری لەبارەی ناردنی مووچەی مانگی حەوت

ئاڤا نیوز 

ئەندامێكی لیژنەی دارایی پەرلەمانی عێراق ڕایدەگەیێنێ، بڕیاری ناردنی مووچەی مانگی حەوت نەگۆڕاوە  و بە هەموو ئەگەرەکان تاوەکو پاشنیوەڕۆی ئەمڕۆ دەنێردرێت.

چیرۆکی سەرەکی: ڕۆژی سێشەممە 13-8-2024 لە بەغدا کۆبوونەوەیەک لەبارەی مووچە و چەند پرسێکی دیکە کرا، لە کۆبوونەوەکەدا تەیف سامی، وەزیری دارایی عێراق ڕایگەیاند ئەم پێنجشەممەیە مووچەی فەرمانبەرانی هەرێمی کوردستان ڕەوانە دەکەن.

لێدوانی فەرمی: خەلیل دۆسكی، ئەندامی لیژنەی دارایی پەرلەمانی عێراق بە ئاڤا نیوزی گوت: دوێنێ شەو پەیوەندیم بە بەرپرسانی وەزارەتی دارایی عێراق كرد، جەختیان كردەوە ئەمڕۆ مووچە دەنێرن، بەپێی زانیارییەكانیشمان ئێستا كۆبوونەوەیەك بۆ ئەو مەبەستە لەنێو وەزارەتەكە بەڕێوەدەچێت.

زانیاریی زیاتر: ئەوەی ئەمڕۆ بڕیارە بنێردرێت تەنیا مووچەی فەرمانبەرانی شارستانییە و هێزە ئەمنییەكانی لەگەڵدا نییە، وەزیری دارایی ڕایگەیاندووە بۆ مووچەی هێزە ئەمنییەكان پێویستی بە بڕیاری سەرۆكوەزیرانی عێراقە.

ئەوەش بزانە: خەلیل دۆسكی جەختیكردەوە بە هەموو ئەگەرەكان دەبێت تاوەكو پاشنیوەڕۆی ئەمڕۆ پارەكە بنێردرێت.