دوو کچی ئێزدی دوای 10 ساڵ لە ڕفاندنیان بەکەسوکاریان شاد بوونەوە

ئاڤا نیوز

دوای زیاتر لە 10 ساڵ لە ڕفاندنیان لە لایەن داعشەوە، دوو کچی ئێزدی لە سووریاوە گەڕێنرانەوە هەرێمی کوردستان.

چیرۆکی سەرەکی: ڕێكخراوی داعش له‌ ئابی 2014دا، هێرشی كرده‌ سه‌ر شنگال و هەزاران ئێزدی لە هەردوو ڕەگەز جینۆساید و زیندە بەچاڵکرد و بەشێکیشیانی بۆ سووریا ڕفاند.

لێدوانی فەرمیی: حوسێن قائیدی، به‌ڕێوه‌به‌ری نوسینگه‌ی رزگاركردنی ئێزدییه‌ ڕفێندراوه‌كان بە ئاڤا نیوزی گوت: پێشوازییان لە دوو کچە ئێزدی ڕزگار کرا و کرد بە ناوەکانی ( خوناڤ و تەواف) کە تەمەنی یەکێکیان 10 ساڵە و ئەوی دیکەش 23 ساڵە و لە ناوچەی گرشینی ئیدارەی زاخۆ بەکەسوکاریان شاد کرانەوە.

له‌ لایەکی دیکەوە: نازم هه‌ركی، به‌رپرسی لقی 17ی پارتی دیموكراتی كوردستان لەسەر هەمان بابەت بە ئاڤا نیوزی گوت: کچە ئازادکراوەکان خەڵکی گوندی کۆجۆن و بە فەرمانی سەرۆکوەزیران بارزانی، هه‌وڵه‌كانیان چڕترکردووەتەوە بۆ ڕزگاركردنی ته‌واوی ڕفێنراوانی کوردانی ئێزدی.

ئەوەی پێویستە بیزانیت: تا ئێستا‌ سێ هەزار و 581 كچ و ژنانی ئێزدی ڕزگار كراون و دوو هەزار و  259 كچ و ژنی دیكه‌ش ماون ڕزگار بکرێن.