یەكێتی داوای دوو پۆستی ئیداری لە سنووری نەینەوا دەکات

ئاڤا دیجیتاڵ

 

بەرپرسێکی یەکێتی لە سنووری پارێزگای نەینەوا نیازی حزبەکەی بۆ وەرگرتنی پۆستێکی ئیداری لە سنوورەکە ئاشکرا کرد و بە مافی خۆیانی دەزانن.

 

لێدوانی فەرمی: "یەکێتی بەشداری لە پێکهێنانی ئیدارەی نێوخۆی موسڵ دەکات؛ خاوەنی دوو کورسین و 50 خاڵمان هەیە، داوای پۆستی یەکێک لە قایمقامەکان، بەڕێوەبەری گشتی و بەڕێوەبەری یەکێک لە ناحیەکان دەکەین". غەیاس سورچی، بەرپرسی ڕاگەیاندنی مەڵبەندی یەکێتی لە نەینەوا وای بە ئاڤا نیوز گوت.

 

زانیاریی زیاتر: لە دوایین کۆبوونەوەی ئەنجوومەنی پارێزگای نەینەوا بۆ دیاریکردنی جێگرانی پارێزگار، سیروان ڕۆژبەیانی وەک جێگری یەکەم لە پشکی پارتی و عومەر نامیق مەولی لە هەویەی وەتەنی بە جێگری دووەم هەڵبژێردران.

 

ژمارەکان وادەڵێن: پۆستەکان بە گوێرەی خاڵ دابەشدەکرێن؛ بۆ هەر کورسییەکی ئەنجوومەن 25 خاڵ هەژمار دەکرێت، ئەگەر بتەوێت پۆستی قایمقامی ناوەندیی موسڵ وەربگریت، پێویستت بە 35 خاڵ هەیە، بەڵام بۆ قەزاکانی دەوروبەر ڕێژەی خاڵەکان کەمترە.