10 ساڵ بەسەر كۆمەڵكوژی شنگال تێپەڕدەبێت

ئاڤا نیوز

 

ئەمڕۆ 10 ساڵ بەسەر کۆمەڵکوژی کوردانی ئێزدی تێپەڕدەبێت، هێشتا گەڕانەوەی ئاوارەکان و دیاریکردنی چارەنووسی تەواوی ڕفێنراوان دوو پرسی بەردەوامن.

 

وێنە گەورەكە: ڕۆژی 03-08-2014، داعش هێرشی کردە سەر شنگال، لە ڕۆژی 13-11-2015، بە سەرپەرشتی سەرۆک بارزانی لەلایەن هێزەکانی پێشمەرگەوە تەواوی شنگال ڕزگار كرا.

 

ئەوەی پێویستە بیزانیت: بەهۆی هێرشەكەی داعش زیاتر لە پێنج هەزار کوردی ئێزدی شەهید کران و زیاتر لە 400 هەزار کەس ئاوارەی هەرێمی کوردستان بوون، زیاتر لە 100 هەزار کەسیش کۆچبەری وڵاتان بوون، شەش ھەزار و 417 کەسیش ڕفێنران.

 

ژمارەکان وادەڵێن: دوای هێرشەکانی داعش تاوەکو ئێستا 92 گۆڕی بەکۆمەڵ و 38 گۆڕی تاکە کەسیی ئێزدییەکان لە شنگال و دەورووبەری دۆزراونەتەوە و نزیکەی 46 لەو گۆڕانە هەڵدراونەتەوە و نزیکەی 500 ڕووفات بۆ بەغدا نێردراون و 175 لەوان ناسنامەیان ئاشکرا کراوە.

 

لێدوانی فەرمی: عەقید شاکر مەحموود، ئەفسەری دەستەی لێکۆڵینەوە و کۆکردنەوەی بەڵگەنامە لە دهۆک بە ئاڤا نیوزی گوت: تا ئێستا لەگەڵ تیمی هەڵدانەوەی گۆڕە بەکۆمەڵەکانی بەغدا کار دەکەین، بە مەبەستی هەڵدانەوەی تەواوی گۆڕەکان.