وەزارەتی گەنجینە: هەر تاکێکی ئەمریكا 102 هەزار دۆلار قەرزدارە

ئاڤا نیوز

جارێکی دیکە قەرزەکانی ئەمریکا ئاستێکی دیکەی تۆمارکرد و بۆ سەرووی 35 ترلیۆن دۆلار بەرزبووەتەوە. 

چیرۆکی سەرەکی: بە گوێرەی داتاکانی وەزارەتی گەنجینەی ئەمریکا کۆی قەرزە  کەڵەکبووەکانی سەر وڵاتە بۆ 35 ترلیۆن و ملیارێک دۆلار بەرزبووەتەوە. سەرەتای ساڵی رابردووش ئاستی 34.006 ترلیۆن دۆلاری تۆمارکرد. لە کاتێکدا لە ساڵی رابردوو ئاستی 33 ترلیۆن دۆلاری تۆمارکردبوو. هەروەها لە ساڵی 2019 کۆی قەرزەکان 13 ترلیۆن دۆلار بوو. 

هۆکارە زانراوەکان: کۆی قەرزەکانی ئەمریکا بەراورد بە کۆی بەرهەمی ناوخۆی وڵاتەکە 122.5٪ بەرزبووەتەوە. هۆکارەکەشی بۆ قەبارەی بودجەکانی وڵاتەکە دەگەڕێتەوە. 76٪ پڕکردنەوەی ئەو قەرزەش پشتی بە باجی تاکەکەسی وڵاتەکە بەستووە. 

ئەوەی پێویستە بیزانیت: ئەگەر قەبارەی قەرزەکە دابەشی ژمارەی دانیشتووانی بکەین، هەر تاکێکی وڵاتەکە 102 هەزار و 810 دۆلار قەرزی لەسەر کەڵەکە بووە، لە کاتێکدا لە ساڵی رابردوو ئەو ژمارەیە 94 هەزار دۆلار بوو. 

ئەوەش بزانە: مایا ماکجینیس سەرۆکی لیژنەی نا حیزبی بۆ بودجەی فیدراڵی ئەمریکا دەڵێت، بەرزبوونەوەی قەبارەی قەرزەکان شۆکهێنەرە، ئاماژەیەکی مەترسیدارە بۆ داکەوتن و دروستبوونی قەیرانی دارایی.